Սուրբ Աննա եկեղեցու միջադեպը հետևանք է իշխանությունների հակաեկեղեցական արշավի. Եկեղեցուն ու Վեհափառին մեղադրելու փոխարեն թող վերանայեն իրենց դիրքորոշումները. Մայր Աթոռ
Երեկ Սուրբ Աննա եկեղեցում արձանագրված միջադեպի առնչությամբ Նիկոլ Փաշինյանի աշխատակազմի ղեկավար Արայիկ Հարությունյանը հանդես է եկել տեսաուղերձով, որում ստեղծված իրավիճակի համար մեղադրում է Հայոց Եկեղեցուն և Ամենայն Հայոց Կաթողիկոսին։
Ի պատասխան 168.am-ի հարցի՝ ինչպե՞ս կարձագանքեք այս հայտարարությանը, Մայր Աթոռի տեղեկատվական համակարգից պատասխանեցին՝ խորապես ցավում ենք Ծաղկազարդի տոնին Սուրբ Աննա եկեղեցում տեղի ունեցածի առնչությամբ, ինչը խաթարեց սրբավայրում տիրող տոնական աղոթական մթնոլորտը.
«Վարչապետի կարճատև այցի ընթացքում արձանագրված միջադեպը պետք է դիտարկել որպես հետևանք իշխանությունների հակաեկեղեցական արշավի և հակաօրինական, ոչ կանոնական գործողությունների, որոնք վիրավորում են հավատացյալների կրոնական զգացումները և տեղիք տալիս նման ընդվզումների։
Ուստի, Հայոց Եկեղեցուն և Ամենայն Հայոց Կաթողիկոսին անհիմն մեղադրելու փոխարեն պետք է անդրադառնալ և վերանայել Եկեղեցու, եկեղեցականների և ազգային-հոգևոր արժեքների հանդեպ իշխանությունների որդեգրած դիրքորոշումները, որոնք ազգավնաս են, պառակտում են մեր ժողովրդին՝ հանգեցնելով նման ցավալի երևույթների»,-նշեցին Մայր Աթոռից:
