Ինչո՞ւ է Անդրանիկ Քոչարյանը հիմա հիշել հայտնի դեպքը. ո՞ւմ է հիշեցնում Վազգեն Սարգսյանի՝ ուղղաթիռի մասին պատմությունը
Մարտի 17-ին «Արմենիա» հեռուստաընկերության եթերում ՀՀ ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը պատասխանելով հաղորդավարի՝ «Միասնության թևեր» քաղաքական նախաձեռնության ղեկավար Արման Թաթոյանի՝ ադրբեջանական դիրքերի և առաջխաղացումների մասին պնդումներին, դիտմամբ թե ակամա 1990-ականներից մի դրվագ էր հիշել՝ նշելով.
«Ես կառաջարկեմ, որ Արման Թաթոյանին ստեղծենք հնարավորություն, որ նա կանգնի այն դիրքերի մոտ, որի մասին ինքը խոսում է, և դա պետք է նախաձեռնել: Ինքը խոսում է դիրքային փոփոխությունների մասին, որը տեղի չի ունեցել: Լավագույն լուծումը, որպեսզի Արման Թաթոյանը գնա այդ դիրքերի մոտից ցույց տա, թե ո՞ր դիրքերն են փոխված: Էդպիսի մի պատմություն եղել է 1990-ականներին, երբ էդպիսի սխալ արտահայտություններով որոշ լրատվամիջոցներ հանդես են եկել, Վազգեն Սարգսյանը չզլացավ և ուղղաթիռ տրամադրեց, ասեց՝ գնացե՛ք Քելբաջար ու տեսեք՝ Քելբաջարում իրականում մենք ծառայություն իրականացնո՞ւմ ենք, թե՞ ոչ»:
Նշենք, որ Քարվաճառն ազատագրվել էր 1993 թվականի գարնանը:
Եվ տարբեր տեղեկություններով, լրագրող Նիկոլ Փաշինյանի անունը ևս կապված է այս պատմության հետ:
Մասնավորապես, քաղաքագետ Աղասի Ենոքյանը մի առիթով «Պրեսսինգ» հաղորդաշարի շրջանակում Սաթիկ Սեյրանյանին պատմել էր, որ Վազգեն Սարգսյանը շատ բուռն է ընդունել նման տեղեկությունների տարածումը և լրագրող Փաշինյանի հոդվածները:
«Հիշում եմ, որ ուրիշի անվան տակ մի պատմություն ներկայացվեց, թե ադրբեջանցիները հետ են վերցրել Օմարի լեռնանցքը մեր զորքերից: Դա ներկայացվեց ուրիշի անվան տակ, և դա լուրջ արձագանք ունեցավ, մանավորապես, Վազգեն Սարգսյանի կողմից»,- մանրամասնել էր նա:
2025 թվականի հոկտեմբերին էլ ՀՀ երրորդ նախագահ Սերժ Սարգսյանը լրագրողների հետ զրույցում, մասնավորապես, ասել էր.
«Ես այդ մարդուն շատ մոտիկից տեսել եմ մաքսիմում 3 անգամ. մի անգամ 1993-ի վերջ-1994-ի սկիզբ, մի անգամ, եթե չեմ սխալվում, 1998-ին, երբ դատարանում ենք հանդիպել, մի անգամ էլ 2018 թվականին, ո՛չ միջնորդավորված խոսել եմ, ո՛չ էլ հեռախոսազրույց եմ ունեցել նրա հետ, ի՞նչ է նշանակում՝ ճանաչել եմ նրան: Իհարկե, ես շատ լավ տեղյակ էի այն բոլոր ստախոսություններին, հերյուրանքներին, շանտաժներին, որ տպագրվում էր նրա կողմից խմբագրվող թերթում, իսկ մինչ այդ էլ մի թերթում, որն ինքը չէր խմբագրում, այսքանը»:
Նույն միտքը Սերժ Սարգսյանն ասել էր նաև 2021 թվականին «Արմնյուզ» հեռուստաընկերությանը տված հարցազրույցում:
«Ապագա կապիտուլյանտն իմ տեսադաշտում հայտնվել է 90-ական թվականների սկզբներին, և, ավելի ստույգ, 1993 թվականի վերջերին, երբ ես մի քանի ամսվա պաշտպանության նախարար էի, և բազմաթիվ հաջողություններից հետո մենք ռազմաճակատում որոշակի խնդիրներ ունեցանք, և այդ խնդիրները մանիպուլացնելով, իրականությանը չհամապատասխանող փաստեր բերելով, անհարկի քննադատելով՝ ուղղակի ցավ էր պատճառում մեզ, ոչ միայն ինձ, այլ նաև իմ մարտական ընկերներին»,- մանրամասնել էր Սերժ Սարգսյանը:
Նշենք, որ Փաշինյանը, ինչպես ինքն է գրել մի առիթով, 1993 թվականից է զբաղվել լրագրողական գործունեությամբ: Եվ նախ հանդիսացել է «Դպրություն», «Լրագիր» «Լրագիր օր», «Մոլորակ» թերթերի թղթակից, իսկ 1998 թ. սեպտեմբերից արդեն «Օրագիր» թերթի գլխավոր խմբագիրը, իսկ 1999 թ. հուլիսից՝ «Հայկական ժամանակ» թերթի:
Հիմա ինչո՞ւ է Անդրանիկ Քոչարյանը հենց այդ դրվագը հիշել՝ շատ լավ իմանալով Նիկոլ Փաշինյանի նկատմամբ (և հակառակը) Վազգեն Սարգսյանի ունեցած վերաբերմունքի մասին…
