ԱՄՆ-ն Իրանում 2000 թիրախ է խոցել. Պենտագոնը նոր մանրամասներ է ներկայացրել
ԱՄՆ զինված ուժերի Կենտրոնական հրամանատարության (CENTCOM) ղեկավար ծովակալ Բրեդ Քուփերը մարտի 3-ին տեսաուղերձում հայտարարել է, որ Իրանի դեմ ռազմական գործություններում ներգրավված է ավելի քան 50 000 զինծառայող, 200 կործանիչ և 2 ավիակիր, ինչպես նաև ռմբակոծիչներ։ Նրա տեսաուղերձը հրապարակվել է X հարթակում CENTCOM-ի էջում։
«Մենք արդեն գրեթե 2000 թիրախ ենք խոցել ավելի քան 2000 զինամթերքով։ Մենք մեծ հարված ենք հասցրել Իրանի հակաօդային պաշտպանությանը և ոչնչացրել Իրանի հարյուրավոր բալիստիկ հրթիռներ, արձակման կայանքներ և անօդաչու թռչող սարքեր», – նշել է նա։
Քուփերը հավելել է, որ ամերիկյան B-2 և B-1 ռմբակոծիչները ճշգրիտ հարվածներ են հասցրել իրանական բազմաթիվ միջուկային օբյեկտների, իսկ B-52 ռմբակոծիչը հարվածել է բալիստիկ հրթիռների ծրագրի հետ կապված հրամանատարական և վերահսկողական դիրքեր։
Քուփերը հավելել է, որ ԱՄՆ-ն ոչնչացրել է իրանական 17 նավ, ինչպես նաև վնասել է իրանական սուզանավ։
«Այսօրվա դրությամբ Պարսից ծոցում, Հորմուզի նեղուցում կամ Օմանի ծոցում ոչ մի իրանական նավ չկա, և մենք կանգ չենք առնի։ Մենք կշարունակենք իրականացնել դինամիկ թիրախավորման գործողությունները», – հայտարարել է Քուփերը։
Նրա խոսքով՝ ի պատասխան ԱՄՆ-ի և Իսրայելի հարձակման՝ Իրանը 500-ից ավելի բալիստիկ հրթիռ և ավելի քան 2000 անօդաչու թռչող սարք է արձակել։
«Մենք տեսնում ենք, որ մեզ և մեր գործընկերներին հարվածներ հասցնելու՝ Իրանի հնարավորությունները կրճատվում են, միևնույն ժամանակ մեր մարտական ներուժն աճում է։ Իմ ընդհանուր գործառնական գնահատականն այն է, որ մենք առաջ ենք ընկել մեր ծրագրից», – հավաստիացրել է ծովակալն իր ելույթում:
ԱՄՆ-ն և Իսրայելը փետրվարի 28-ից հարվածներ են հասցնում Իրանին՝ դա անվանելով «կանխարգելիչ» հարձակում։ Նրանց պնդմամբ՝ Իրանը զարգացնում էր իր մեծ հեռահարության բալիստիկ հրթիռների ծրագիրը, նաև ցանկանում էր միջուկային զենք ստեղծել։ Թեհրանը հերքել է մեղադրանքները և պատասխան հարվածներ է հասցնում՝ թիրախավորելով Իսրայելը, ինչպես նաև Մերձավոր Արևելքի երկրներում ԱՄՆ-ի ռազմակայանները և էներգետիկ օբյեկտները։
