Թրամփը հայտարարել է Մեքսիկայի նախագահի հետ արդյունավետ հեռախոսազրույցի մասին
Միացյալ Նահանգների նախագահ Դոնալդ Թրամփը հայտարարել է, որ շատ արդյունավետ զրույց է ունեցել Մեքսիկայի նախագահ Կլաուդիա Շեյնբաումի հետ։«Արմենպրես»-ի հաղորդմամբ՝ այս մասին ԱՄՆ նախագահը նշել է Truth Social սոցիալական ցանցում՝ մանրամասնելով, որ զրույցի թեմաներն են եղել սահմանային անվտանգությունը, առևտուրը և թմրանյութերի վերահսկողությունը։
«Ես շատ արդյունավետ հեռախոսազրույց ունեցա Մեքսիկայի նախագահ Կլաուդիա Շեյնբաումի հետ։ Այն բացառիկ լավ անցավ երկու երկրների համար էլ։ Զրույցի հիմնական ուշադրության կենտրոնում էին սահմանային հարցերը, թմրանյութերի վերահսկողությունը և առևտուրը»,-գրել է Թրամփը։Դոնալդ Թրամփը նաև շեշտել է, որ ինքը և Մեքսիկայի նախագահը շուտով կրկին կզրուցեն և հանդիպումներ կկազմակերպեն ԱՄՆ-ում և Մեքսիկայում։
«Մեքսիկան հիանալի և շատ խելացի առաջնորդ ունի․ նրանք (խմբ․ մեքսիկացիները) պետք է շատ հպարտ լինեն այդ կապակցությամբ»,-եզրափակել է ԱՄՆ նախագահը։
