ԱՄՆ-ն ավիաընկերություններին խորհուրդ է տվել «զգուշություն ցուցաբերել» Մեքսիկայի օդային տարածքում
ԱՄՆ ավիացիոն իշխանություններն ուրբաթ օրը ծանուցումներ են հրապարակել, որոնցում ավիաընկերություններին հորդորվում է «զգուշություն ցուցաբերել» Մեքսիկայի և Կենտրոնական Ամերիկայի օդային տարածքում, ինչը կապված է «ռազմական գործողությունների» հետ, հայտնում է AFP-ն։
Դաշնային ավիացիոն վարչությունը (FAA) հրապարակել է մի շարք հաղորդագրություններ՝ զգուշացնելով «պոտենցիալ վտանգավոր իրավիճակի» մասին, որոնցում նշվում է Գլոբալ նավիգացիոն արբանյակային համակարգի (GNSS) աշխատանքին միջամտելու հնարավորության մասին։
«FAA-ն օդաչուներին խորհրդատվական ծանուցումներ է ուղարկել Մեքսիկայի որոշակի շրջաններում, Կենտրոնական Ամերիկայում, Պանամայում, Բոգոտայում, Գուայակիլում և Մասատլանում, ինչպես նաև Խաղաղ օվկիանոսի արևելյան հատվածի օդային տարածքում թռիչքների վերաբերյալ»,- ասել է գերատեսչության ներկայացուցիչը։
Հանձնարարականն ուժի մեջ է մնում 60 օրվա ընթացքում:
Այս հայտարարությունն արվել է շարունակվող իրադարձությունների ֆոնին, որոնք կապված են հունվարի 3-ին ԱՄՆ հատուկ նշանակության ջոկատայինների իրականացրած ռեյդի և ավիահարվածի հետ, ինչի արդյունքում Վենեսուելայի նախագահ Նիկոլաս Մադուրոն և նրա կինը՝ Սիլիա Ֆլորեսը, գերեվարվել են և կանգնել ԱՄՆ դատարանի առաջ՝ թմրամիջոցների անօրինական շրջանառության և այլ մեղադրանքներով:
Նախագահ Դոնալդ Թրամփը նաև ենթադրել է, որ ծրագրում է ցամաքային հարվածներ հասցնել Մեքսիկայի թմրակարտելներին։
