ԱՄՆ մաքսատուրքերն Իրանի գործընկերների նկատմամբ կարող են վտանգավոր հետևանքներ ունենալ միջազգային առևտրի համար․ Իրանի ԱԳՆ
ԱՄՆ-ի կողմից Իրանի տնտեսական գործընկերների նկատմամբ սահմանված առևտրային մաքսատուրքերը կարող են վտանգավոր հետևանքներ ունենալ համաշխարհային առևտրի համար։ Այս մասին Telegram-ում հայտարարություն է տարածել Իսլամական Հանրապետության արտաքին գործերի նախարարությունը՝ վկայակոչելով գերատեսչության խոսնակ Էսմայիլ Բաղայիի խոսքերը։
«Իրանի ժողովուրդն ավելի քան 75 տարի տարբեր պատրվակներով ենթարկվել է ԱՄՆ-ի և նրա որոշ դաշնակիցների դաժան և անօրինական տնտեսական պատժամիջոցներին և ճնշումներին, և սա արտացոլում է ԱՄՆ քաղաքականության մշակման և քաղաքական որոշումների կայացման համակարգում Իրանի ժողովրդի նկատմամբ ինստիտուցիոնալացված դժգոհության իրականությունը», – նշել է Բաղային։
Նրա խոսքով՝ ԱՄՆ տնտեսական պատժամիջոցները համարվում են մարդկության դեմ հանցագործություն՝ Իրանի յուրաքանչյուր քաղաքացու հիմնարար իրավունքների խախտման և ոտնահարման պատճառով, և պատժամիջոցներ կիրառողները պետք է պատասխանատվություն կրեն այդ հանցագործությունների հետևանքների համար։
«Արտգործնախարարության խոսնակը նաև զգուշացրել է միջազգային առևտրային համակարգի վրա ԱՄՆ-ի միակողմանի պատժիչ գործողությունների վտանգավոր հետևանքների մասին՝ նշելով ՄԱԿ-ի և նրա բոլոր մարմինների, այդ թվում՝ գլխավոր քարտուղարի պատասխանատվությունը՝ կատարելու իրենց պարտականությունները միջազգային մակարդակով օրենքի գերակայությունը պահպանելու հարցում», – նշվել է Իրանի արտաքին գործերի նախարարության հայտարարության մեջ։
Բաղային նաև ընդգծել է, որ Իրանի ժողովուրդն, անկասկած, ուժով կշարունակի երկրի առաջընթացի և զարգացման ուղին՝ հենվելով իր կարողությունների և փորձի վրա՝ դաժան հարձակումների և ճնշումների պայմաններում։
Ավելի վաղ ԱՄՆ նախագահ Դոնալդ Թրամփը հայտարարել էր Իրանի հետ համագործակցող բոլոր երկրների համար 25 տոկոս մաքսատուրքեր սահմանելու մասին։
