Մեքսիկայում մարդատար գնացքը դուրս է ընկել ռելսերից․ 13 մարդ զոհվել է
Մեքսիկայի Օախակա նահանգում մարդատար գնացքի՝ ռելսերից դուրս ընկնելու հետևանքով զոհվել է տասներեք մարդ, վիրավորվել՝ 98-ը: Այս մասին Մեքսիկայի նախագահ Կլաուդիա Շեյնբաումը հաղորդել է X սոցիալական ցանցում։
Տուժածներից հինգը գտնվում են ծանր վիճակում։
Մեքսիկայի ռազմածովային ուժերի նախարարությունը հաղորդել է, որ աղետի ենթարկված գնացքում եղել է 241 ուղևոր և անձնակազմի ինն անդամ։
Մեքսիկայի ռազմածովային ուժերը ցավակցություն են հայտնել զոհերի ընտանիքներին և հայտարարել, որ պատրաստ են անհապաղ աջակցություն ցուցաբերել տուժածներին։
Վթարը տեղի է ունեցել կիրակի օրը՝ դեկտեմբերի 28-ին, Օախակա հարավային նահանգի Չիվելա և Նիսանդա բնակավայրերի միջև։
Մեքսիկայի գլխավոր դատախազ Էռնեստինա Գոդոյ Ռամոսն իր հերթին հայտնել է, որ միջադեպի հետաքննությունն արդեն սկսվել է։
