OpenAI-ը 300 մլրդ դոլարի պայմանագիր է կնքել Oracle-ի հետ

Ամերիկյան OpenAI ընկերությունը, որն արհեստական բանականության հիման վրա աշխատող ChatGPT չաթբոտի մշակողն է, պայմանագիր է կնքել հինգ տարվա ընթացքում Oracle ընկերությունից 300 միլիարդ դոլարի հաշվողական հզորություն գնելու վերաբերյալ։ Այս մասին գրում է The Wall Street Journal-ը՝ հղում անելով իրազեկ աղբյուրներին։The Wall Street Journal-ը գրում է, որ սա ամպային տեխնոլոգիաների ոլորտի պատմության մեջ ամենամեծ պայմանագրերից մեկն է։

Այն ցույց է տալիս, որ արհեստական ​​բանականության ընկերությունների կողմից տվյալների կենտրոնների հզորության վրա ծախսերը շարունակում են ռեկորդներ սահմանել։

Պայմանագիրը նախատեսում է 2027 թվականից 4.5 ԳՎտ ծավալով հաշվողական հզորության մատակարարում։Պարբերականը նշում է, որ OpenAI-ի տարեկան եկամուտը կազմում է մոտ 10 միլիարդ դոլար, ինչը զգալիորեն պակաս է Oracle-ի հետ կնքված պայմանագրի համաձայն տարեկան վճարվող 60 միլիարդ դոլարից։

Պայմանագրի առաջին տարում OpenAI-ը ստիպված կլինի վճարել ավելի քան 30 միլիարդ դոլար, իսկ վճարումները կավելանան հաջորդ տարիներին՝ նոր տվյալների կենտրոնների շահագործմանը զուգընթաց։