Հունգարիան և Լեհաստանը վերսկսում են համագործակցությունը. Օրբան
Հունգարիայի վարչապետ Վիկտոր Օրբանը հայտարարել է, որ Բուդապեշտը և Վարշավան վերսկսում են համագործակցությունը Լեհաստանի նոր նախագահ Կարոլ Նավրոցկու գալուց հետո: Օրբանը նաև հույս է հայտնել, որ Վիշեգրադյան խմբի (Լեհաստան, Հունգարիա, Չեխիա, Սլովակիա – V4) գործունեությունը նույնպես կվերսկսվի 2026 թ. հունվարին, եթե Չեխիայում աշնանը կայանալիք ընտրությունների արդյունքներով վարչապետի պաշտոնն զբաղեցնի Անդրեյ Բաբիշը։ Այս մասին Օրբանը գրել է իր Facebook-յան էջում։ «(Հունգարիայում ԵՄ հարցերով) նախարար Բոկան վերադարձել է Լեհաստանից։ Նա Լեհաստանի նախագահից ամենալավ նորություններն է բերել։ Մենք սկսում ենք վերականգնել լեհ-հունգարական համագործակցությունը։ (Սլովակիայի վարչապետ) Ֆիցոն դիմանում է, Բաբիշն արդեն դարպասների մոտ է, V4-ը կարող է վերսկսվել հունվարից», – գրել է Օրբանը։
2025 թվականի հունիսին Լեհաստանում կայացած նախագահական ընտրություններից հետո Օրբանը շնորհավորեց Նավրոցկուն հաղթանակի կապակցությամբ և հայտարարեց, որ դա դրական ազդեցություն կունենա Վիշեգրադյան խմբում փոխգործակցության վրա։
Հունգարիայի ԱԳ նախարար Պետեր Սիյարտոն 2024 թ. մարտին հայտարարել էր, որ V4-ը շարունակում է իր աշխատանքը, չորս երկրների միջև համագործակցությունը կարող է արդյունավետ լինել անօրինական միգրացիայի, եվրոպացի ֆերմերների շահերի պաշտպանության, ինչպես նաև մի շարք ազգային իրավասությունների պաշտպանության հարցում, չնայած մի շարք այլ հարցերի շուրջ տարաձայնություններին, օրինակ՝ Ուկրաինայի։
