Նշվել են լավագույն մարզաձևերը կանանց համար
Կանանց համար լավագույն մարզաձևերն են յոգան, ուժային վարժությունները, ինչպես նաև աերոբիկ ծանրաբեռնվածությունը՝ ներառյալ լողը։ Այդ մասին «Комсомольская правда»-ի հետ զրույցում պատմել է ՌԴ վաստակավոր բժիշկ Իննա Ապոլիխինան։
Բժշկուհու խոսքով՝ մարզումները կանխարգելում են բազմաթիվ հիվանդություններ և օգտակար են կանանց ցանկացած տարիքում։ Ֆիզիկական ակտիվությունը օգնում է նվազեցնել ինսուլինի և կորտիզոլի մակարդակը:
Այնուամենայնիվ, ծանրաբեռնվածությունը պետք է լինի չափավոր։
Խորհուրդ է տրվում շաբաթական առնվազն 150 րոպե (օրական 20-25 րոպե) տրամադրել վարժություններին։ Սա վերաբերում է ինչպես հղիներին, այնպես էլ կանանց, որոնք գտնվում են նախամենոպաուզայի կամ մենոպաուզայի շրջանում։
Հղիների դեպքում ֆիզիկական ակտիվությունն օգնում է նվազեցնել հղիության ընթացքում շաքարային դիաբետի առաջացման ռիսկերը, ինչպես նաև ուժեղացնել մեջքի և կոնքի մկանները՝ ծննդաբերության ժամանակ ցավերը մեղմելու համար։ Իսկ մենոպաուզայի շրջանի կանանց մոտ մարզումները նվազեցնում են տաքության ալիքների հաճախականությունն ու ինտենսիվությունը, կարգավորում են տրամադրության տատանումները:
