Օ՛Բրայենի էմոցիոնալ գնահատականները չեմ մեկնաբանի, ՀՀ-ն հիմա պակաս խոցելի վիճակում է. Նիկոլ Փաշինյան
1991 թվականի համեմատ ՀՀ-ն հիմա պակաս խոցելի վիճակում է։ Այս մասին ՀՀ կառավարության նիստից հետո ճեպազրույցի ժամանակ հայտարարեց Նիկոլ Փաշինյանը` անդրադառնալով ԱՄՆ պետքարտուղարի Եվրոպայի և Եվրասիայի հարցերով նախկին օգնական Ջեյմս Օ՛Բրայենի հայտարարությանը։
Նշենք, որ Ջեյմս Օ՛Բրայենը հայտարարել էր, որ օգոստոսի 8–ին Վաշինգտոնում ստորագրված պայմանագրով Ադրբեջանը ստացավ իր ցանկալին, իսկ Հայաստանը չստացավ ոչինչ և դարձավ ավելի խոցելի։
«Ջեյմս Օ՛Բրայենը խոսում է ՀՀ-ի խոցելիությունների մասին։ Ես պիտի արձանագրեմ, որ ՀՀ–ն ամենախոցելին եղել է հենց իր և իրենց պաշտոնավարման շրջանում. ուզում եմ հիշեցնել 2021թ., 2022թ., 2023թ. իրադարձությունները։ Մենք երբեք բավարարված չենք եղել արձագանքից և աշխատանքից, որ ԱՄՆ-ի այդ պահին գործող վարչակազմը իրականացրել է մեր տարածաշրջանում խաղաղության օրակարգին աջակցելու համար»,– ընդգծեց Փաշինյանը։
Նրա խոսքով` Օ՛Բրայենը մի մարդ է, որը այդ ամենի արդյունքում զրկվել է իր աշխատանքից և նրա էմոցիոնալ գնահատականներն ինքը չի պատրաստվում մեկնաբանել։
«Եթե նա աշխատանքից զրկվել է, ապա նա պետք է ինքնահայեցմամբ զբաղվի, այլ ոչ թե իր աշխատանքի կորցնելու մեղքը փորձի բարդել ՀՀ-ի վրա»,– ասաց Փաշինյանը։
