Մակրոնը Շվեյցարիան առաջարկել է որպես Պուտինի և Զելենսկու հանդիպման վայր
Ֆրանսիայի նախագահ Էմանուել Մակրոնը Ժնևը նշել է որպես Ուկրաինայի նախագահ Վոլոդիմիր Զելենսկու հետ Ռուսաստանի նախագահ Վլադիմիր Պուտինի երկկողմ հանդիպման հնարավոր վայր: Այդ մասին նա ասել է TF1-ին տված հարցազրույցում:
Ֆրանսիայի ղեկավարը մերժել է Պուտին-Զելենսկի հանդիպումը Փարիզում անցկացնելու հնարավորությունը, ինչպես եղել էր 2019 թվականին: Նա նշել է, որ իրադրությունն «այլ փուլում է», և որ պահանջվում է գտնել «չեզոք երկիր»:
«Հնարավոր է Շվեյցարիան, ես հանդես եմ գալիս Ժնևի օգտին: Կամ դա կլինի մեկ այլ երկիր: Անցյալ անգամ երկկողմ խորհրդակցություններն անցկացվել են Թուրքիայում՝ Ստամբուլում», – ասել է նա:
Մակրոնը հավելել է, որ ԱՄՆ նախագահ Դոնալդ Թրամփի, Վոլոդիմիր Զելենսկու և եվրոպացի ղեկավարների՝ Վաշինգտոնում կայացած հանդիպմանը քննարկվել է Ռուսաստանի Դաշնության և Ուկրաինայի միջև բարձր մակարդակի երկկողմ շփումներ անցկացնելու հնարավորությունը, որին պետք է հաջորդեն եռակողմ հանդիպումն ԱՄՆ-ի ներկայությամբ և բազմակողմ հանդիպումն՝ ավելի լայն շրջանակի երկրների մասնակցությամբ:
