Թեհրանին հավաստիացրել են՝ Հարավային Կովկասում օտարերկրյա զինված ուժեր չեն լինի․ Իրանի ԱԳՆ
Իրանական կողմը հավաստիացումներ է ստացել, որ վաշինգտոնյան համաձայնագրի կնքումից հետո երրորդ երկրների զինված ուժերը չեն տեղակայվի Հարավային Կովկասում։ Այս մասին այսօր կայացած ճեպազրույցի ժամանակ հայտարարել է Իրանի ԱԳՆ պաշտոնական ներկայացուցիչ Իսմայիլ Բաղային:
«Մենք օգտակար չենք համարում օտարերկրյա զինված ուժերի ներկայությունը Հարավային Կովկասում։ Այս կապակցությամբ մենք մեր մտահոգությունն ենք հայտնել։ Մեզ հավաստիացրել են, որ Հարավային Կովկասում երրորդ երկրների զինված ուժեր չեն տեղակայվի։ Խաղաղության համաձայնագրի առանցքային դրույթներից է Հայաստանի և Ադրբեջանի ընդհանուր սահմանների երկայնքով երրորդ երկրների որևէ զինված ուժերի չտեղակայման մասին կետը»,- ասել է Բաղային:
Նա շեշտել է, որ պաշտոնական Թեհրանն ուշադիր հետևում է տարածաշրջանում տեղի ունեցող զարգացումներին և սերտ կապի մեջ է Երևանի ու Բաքվի հետ։
