593.000 եվրոյի հրատապ մեկ անձից գնում են կատարել

ԿԳՄՍ նախարարությունը անհետաձգելի է համարել Վանաձորում ՈՒԵՖԱ ստանդարտներով ֆուտբոլի մարզադաշտի կառուցման/վերակառուցման աշխատանքները և որոշել է՝ հրատապ մեկ անձից գնում պետք է կատարվի՝ նախագծանախահաշվային փաստաթղթերի մշակման ծառայության գնման համար։

Խոսքը Վանաձորում 10.000 նստատեղով մարզադաշտ ունենալու մասին է. հին չշահագործվող  3000 նստատեղով մարզադաշտը պետք է վերակառուցվի՝ դառնալով 10.000 նստատեղ։

Այդ նպատակով ՀՀ ԿԳՄՍ նախարարությունը ստացել է երկու գնային առաջարկ՝ «The stadium Consultancy B.V.» և «VenueEra Holding LLC» ընկերություններից։

Երկու ընկերությունների հետ էլ նախարարությունն ունեցել է բանավոր և գրավոր բանակցություններ և, քանի որ բովանդակային մասով երկուսի առաջարկներն էլ նույնն էին, նախարարությունը՝ որպես նախագծող, ընտրել է նվազագույն գնային առաջարկ ներկայացրած ընկերությունը՝ «ՎենյուԷրա Հոլդինգ» ՍՊԸ-ն։

Այս ընկերությունից ԿԳՄՍՆ-ն 593.000 եվրոյի մեկ անձից գնում է կատարել, որից 98,840.0 եվրոն՝ ծրագրի նախապատրաստման համար, իսկ 494,200.0 եվրոն՝ նախագծման համար։

Շինարարական աշխատանքները լավագույն դեպքում հնարավոր կլինի մեկնարկել 2026թ. հունիսի կեսերին։

Շինարարությունը կտևի 24 ամիս։