Դրա փոխարեն թող բանակի սպառազինությունը համալրեն․ կռիվ անեն ոչ թե ժողովրդի դեմ, այլ Հայաստանի իրական թշնամիների․ Իրավապաշտպան
Հակաահաբեկչական գործողությունների իրականացմանը մասնակցելիս կամ ռազմական դրություն հայտարարված տարածքում իրականացվող պատերազմական գործողությունների շրջանակում հատուկ առաջադրանքներ կատարելիս ՀՀ ոստիկանության գվարդիան այսուհետ կունենա հատուկ տեխնիկա․ համապատասխան որոշումն ընդունվեց կառավարության վերջին նիստում՝ չզեկուցվող հարցերի փաթեթով։
Ըստ այդմ`ոստիկանության գվարդիայի սպառազինության մեջ կընդգրկվի հատուկ տեխնիկա`զրահափոխադրիչ ԲՏՌ-80, զրահափոխադրիչ ԲՌԴՄ-2։ Որոշումն ուժի մեջ է մտնում 2025 թվականի նոյեմբերի 1-ից: Նկատենք՝ այս որոշումը տարբեր շրջանակներ դիտարկում են նախընտրական տրամաբանության մեջ։
168․am-ի հետ զրույցում այս համալրմանն անդրադառնալով՝ իրավապաշտպան Հովհաննես Խուդոյանը հիշեցրեց․
«Մարտի 1-ին, երբ ոստիկանական զորքերն արտակարգ դրության պայմաններում մի տեղ կանգնեցրել էին ԲՏՌ, այդ ինֆորմացիան իրենք տարածում էին, թե տանկերով եկել են ժողովրդին լղճելու։ Հիմա ինքն ուզում է այդ գործիքակազմը կիրառի, ընդ որում՝ ոչ թե արտակարգ դրության պայմաններում, այլ սովորական պայմաններում ևս։
Իսկ այն ռեսուրսը, որ ծախսում է դրա վրա, շատ ավելի կարևոր ուղղություններ կան ծախսելու․ դրա փոխարեն՝ թող բանակի սպառազինությունը համալրեն, կռիվ անեն ոչ թե ժողովրդի դեմ, այլ Հայաստանի իրական թշնամիների»։
Անդրադառնալով «հակաահաբեկչական» ձևակերպմանը՝ իրավապաշտպանը զուգահեռներ անցկացրեց այսօր իշխանությունների կողմից բազմակիրառ «ահաբեկիչ» պիտակավորման հետ։
«Երբ իրենք դա փաթեթավորում են հակաահաբեկչական լոգիկայի մեջ, դա բխում է իրենց այս վերջին իրադարձություններից․ կեղծ մեղադրանքները նաև սրան են ծառայում, որ այդ գործիքակազմն այն աստիճանի ուժեղացնեն, որ հետագայում որևէ դժգոհություն իրենց իշխանությունից չլինի․ ինչ բռնապետական վիճակ էլ արտահայտեն, այդ գործիքակազմը կիրառեն ու հղում կատարեն, թե իբր Հայաստանում ահաբեկչություն էր պատրաստվում, դրա համար ենք այսպիսի բաներ արել։ Իսկ իրականում դա էլ է իրենց հնարած սուտը ու դրա վրա կառուցում են բռնապետական գործիքակազմը»,- ամփոփեց Հովհաննես Խուդոյանը։
Հիշեցնենք՝ ՆԳՆ առաջարկած նախագծի հիմնավորման մեջ նշվում էր․ «2024թ. հոկտեմբերի 24-ին ընդունվել է «Ոստիկանության գվարդիայի մասին» օրենքը, համաձայն որի՝ հակաահաբեկչական գործողությունների իրականացմանը մասնակցելիս կամ ռազմական դրություն հայտարարված տարածքում իրականացվող պատերազմական գործողությունների շրջանակներում հատուկ առաջադրանքներ կատարելիս ոստիկանության գվարդիայի ծառայողը ոստիկանության պետի հրամանով իրավասու է օրենքով նախատեսված լիազորությունների պատշաճ իրականացումն ապահովելու համար գործադրելու ոստիկանության գվարդիայի սպառազինության մեջ ընդգրկված հատուկ տեխնիկա, որի ցանկը սահմանում է կառավարությունը»։
