Վաշինգտոնը կարող է ստանձնել Ուկրաինայում ատոմակայանների կառավարումն «առանց մեծ խնդիրների»․ ԱՄՆ էներգետիկայի նախարար
Միացյալ Նահանգները կարող է ստանձնել Ուկրաինայում ատոմային էլեկտրակայանների կառավարումը «առանց մեծ խնդիրների», եթե այդ մասին ընդունվի համապատասխան քաղաքական որոշում։ Այս մասին, ինչպես հաղորդում է Bloomberg-ը, հայտարարել է ԱՄՆ էներգետիկայի նախարար Քրիս Ռայթը։
«Մենք կներգրավենք ամերիկացի բարձրակարգ միջուկային փորձագետների, որոնք տեղացի մասնագետների հետ համատեղ կընդունեն կշռադատված որոշումներ։ ԱՄՆ-ն այս ոլորտում զգալի փորձ ունի»,-նշել է Ռայթը։
Միևնույն ժամանակ, նա հստակեցրել է, որ այս պահին չի ընթանում երկխոսություն այնպիսի օբյեկտների՝ օրինակ Զապորոժիեի ատոմային էլեկտրակայանի հնարավոր ձեռքբերման մասին, որը համարվում է Եվրոպայի խոշորագույնը և պատերազմի սկզբից գտնվում է ռուսական վերահսկողության տակ։
Ուկրաինայի էներգետիկ ենթակառուցվածքի կառավարմանն աջակցելու վերաբերյալ նախաձեռնությունը հնչեցրել է ԱՄՆ նախագահ Դոնալդ Թրամփը՝ Ուկրաինայի նախագահ Վլադիմիր Զելենսկու հետ կայացած հեռախոսազրույցի ընթացքում։
