«Ռոսնանո»-ի թոփ մենեջերները, այդ թվում՝ մեկ հայ, բերման են ենթարկվել ավելի քան 43 մլրդ ռուբլու չարաշահման գործով
Ռուսական «Ռոսնանո» պետական կորպորացիայի երեք թոփ մենեջերները բերման են ենթարկվել պաշտոնեական լիազորությունները չարաշահելու և ծանր հետևանքների հանգեցնելու գործով, հայտնում է ՌԴ ՆԳՆ-ն՝ մանրամասնելով, որ խոսքն ավելի քան 43 միլիարդ ռուբլու չարաշահման վերաբերյալ հետաքննության մասին է:
Բերման են ենթարկվել «Ռոսնանո»-ի գործադիր տնօրեն Բորիս Պոդոլսկին, ֆինանսների գծով գործադիր տնօրեն Արթուր Գալստյանը և հաշվապահական մեթոդիկաբանության, հարկման և հաշվետվությունների գծով տնօրեն Մարինա Կասենկովան։ Նրանց սպառնում է մինչև տասը տարվա ազատազրկում:
Հետաքննությունը կարծում է, որ 2017 թվականին կասկածյալները «անօրինական գործողություններ են կատարել ֆինանսական պարտավորությունները վերադասակարգելու համար»՝ թաքցնելու ընկերության տնտեսական գործունեության բացասական արդյունքները։ Այս մասին գրում է forbes.ru-ն:
«Օգտագործելով խեղաթյուրված հաշվետվության տվյալները՝ նրանք ընկերության միակ բաժնետիրոջը՝ ի դեմս Ռուսաստանի Դաշնության, կեղծ տեղեկություններ են ներկայացրել «Ռոսնանո» ԲԸ-ի ենթադրյալ բավարար ֆինանսական վիճակի մասին: Դա հնարավորություն է տվել խուսափել նախկինում տրված պետական երաշխիքների չեղարկումից, ինչպես նաև ներգրավել լրացուցիչ ֆինանսավորում»,- ասված է հաղորդագրությունում։
Արդյունքում 2022-2024 թվականներին պետական կորպորացիային բյուջեից հատկացվել է ավելի քան 43 միլիարդ ռուբլի:
