Սպիտակ տունը չեղարկել է արտաքին օգնության սառեցումը՝ իրավական մարտահրավերների ֆոնին. Reuters
ԱՄՆ նախագահ Դոնալդ Թրամփի վարչակազմը հունվարի 29-ին հրաժարվել է հարյուր միլիարդավոր դոլարի օգնության սառեցումից՝ բախվելով իրավական խնդիրների և լուրջ քննադատության, թեև պաշտոնյաներն ասել են, որ, միևնույն է, պլանավորում են կրճատել ֆինանսական միջոցներն այն գործունեության համար, որին Թրամփը դեմ է։
Այս մասին հաղորդում է Reuters գործակալությունը:
Սպիտակ տան բյուջեի վարչությունը դաշնային գործակալություններին հայտնել է, որ չեղյալ է հայտարարում այն հուշագիրը, որով կարգադրվել էր դադարեցնել դրամաշնորհների և վարկերի վճարումները:
Նոր կարգադրությունն արվել է դաշնային դատարանում նախատեսված լսումներից անմիջապես առաջ. դեմոկրատների կողմից վերահսկվող նահանգների գլխավոր դատախազները հայց էին ներկայացրել դատարան՝ փորձելով դադարեցնել օգնության տրամադրման սառեցումը: Սպիտակ տան պաշտոնյան ասել է, որ որոշման չեղարկման միջոցով փորձ է արվում կասեցնել իրավական գործընթացը:
Դատական լսումներն, այնուամենայնիվ, տեղի են ունեցել, և ԱՄՆ շրջանային դատավոր Ջոն ՄաքՔոնելն ասել է, որ հակված է ժամանակավորապես արգելափակել ԱՄՆ վարչակազմի կողմից օգնության սառեցումը, թեև դա անմիջապես չի արել: Այդուհանդերձ, օգնության սառեցումը ժամանակավորապես արգելափակվել էր Վաշինգտոնի դաշնային դատավորի կողմից՝ մի շարք փաստաբանական խմբերի կողմից ներկայացված հայցի հիման վրա։
Ավելի վաղ Սպիտակ տունը հաղորդել էր, որ ԱՄՆ նախագահ Դոնալդ Թրամփը հրամանագիր է ստորագրել, ըստ որի 90 օրով դադարեցվում է զարգացման նպատակներով օգնության տրամադրումն այլ երկրներին՝ գնահատելու այդ ծրագրերի համապատասխանությունը ԱՄՆ արտաքին քաղաքականությանը։ Թրամփի այս որոշման պատճառով ՄԱԿ-ի փախստականների հարցերով գերագույն հանձնակատարի գրասենյակը կրճատել է հումանիտար աջակցության միջազգային ծրագրերը։
