Խորվաթիայի գործող նախագահ Միլանովիչը ձայների 74,66%-ով հաղթում է ընտրություններում
Խորվաթիայի ներկայիս նախագահ Զորան Միլանովիչը ստանում է ընտրողների ձայների 74,66%-ը պետության ղեկավարի ընտրությունների երկրորդ փուլի արդյունքներով՝ ընտրատեղամասերի 99,48%-ի տվյալների մշակումից հետո։ Ինչպես տեղեկանում ենք ՏԱՍՍ գործակալությունից, այդ մասին հաղորդել է հանրապետության Պետական ընտրական հանձնաժողովը։
Ընտրական հանձնաժողովի տվյալներով՝ 6755 ընտրատեղամասերից 6720-ից ստացված տվյալների հիման վրա Միլանովիչը հավաքում է ընտրողների 1 114 383 ձայն (74,66%)։ Անկախ թեկնածու Դրագան Պրիմորացը, որին աջակցում է «Խորվաթիայի դեմոկրատական համագործակցություն» իշխող կուսակցությունը, ստանում է 378 172 ձայն (25,34%)։ Ընտրողների մասնակցությունը կազմել է 44,16%:
Միլանովիչը 2024 թ. դեկտեմբերի 29-ին կայացած ընտրությունների առաջին փուլում ստացել է ընտրողների 49,09%-ի աջակցությունը, նրա հիմնական մրցակից Պրիմորացը՝ 19,35%-ը։
Խորվաթիան խորհրդարանական հանրապետություն է։ Պետության ղեկավարի լիազորություններն այդ երկրում կրում են սահմանափակ բնույթ, բայց զուտ ներկայացուցչական չեն։ Խորհրդարանի հետ համաձայնեցնելուց հետո նախագահը նշանակում է վարչապետին և կառավարության կազմը: Նախարարների կաբինետի հետ միասին նախագահը մասնակցում է արտաքին քաղաքականության և պաշտպանության ռազմավարության ձևավորմանն ու իրականացմանը, վերահսկում է անվտանգության ծառայությունների աշխատանքը, որոշումներ է կայացնում դիվանագիտական հարաբերությունների հաստատման վերաբերյալ։ Նախագահը գերագույն հրամանատարն է և իրավունք ունի նշանակելու զինված ուժերի հրամանատարական կազմը։ Պետության ղեկավարը չի կարող լինել որևէ կուսակցության անդամ: Նրա պաշտոնավարման ժամկետը հինգ տարի է՝ մեկ անգամ վերընտրվելու իրավունքով։Նախագահն ընտրվում է ուղղակի ընդհանուր քվեարկությամբ։ Այդ պաշտոնի հավակնորդները պետք է լինեն Խորվաթիայի քաղաքացիներ՝ 18 տարեկանից ոչ երիտասարդ:
Առաջադրման համար անհրաժեշտ է հավաքել ընտրողների առնվազն 10 000 ստորագրություն։ Առաջին փուլում հաղթելու համար անհրաժեշտ է հավաքել ձայների 50%-ից ավելին։ Անհրաժեշտության դեպքում 14 օր հետո անցկացվում է երկրորդ փուլ առաջին փուլում ամենաշատ ձայներ ստացած երկու հավակնորդների միջև։
