Թրյուդոն կարող է հայտարարել իշխող կուսակցության ղեկավարի պաշտոնից հեռանալու մասին. The Globe and Mail
Վարչապետ Ջասթին Թրյուդոն շուտով կարող է հայտարարել, որ կհրաժարվի Կանադայի իշխող Լիբերալ կուսակցության ղեկավարի պաշտոնից։ Այս մասին հայտնում է The Globe and Mail թերթը։
Աղբյուրների համաձայն՝ կառավարության ղեկավարը համապատասխան հայտարարություն կարող է անել հունվարի 6-ին։
Դեկտեմբերի 16-ին փոխվարչապետ և ֆինանսների նախարար Քրիստիա Ֆրիլանդը հայտարարեց, որ հրաժարական է տալիս, քանի որ Թրյուդոն որոշել է նրան տեղափոխել այլ աշխատանքի։ Նույն օրը Բնակարանաշինության, ենթակառուցվածքների և համայնքների նախարար Շոն Ֆրեյզերը հայտարարեց կառավարությունից իր հրաժարականի մասին։ Դա առաջացրել է վարչապետի քննադատությունը ընդդիմության և հասարակական գործիչների կողմից, ովքեր պահանջում էին նրա անհապաղ հրաժարականը, քանի որ նա չի կարող վերահսկել իր կաբինետը։ Ավելին, մի քանի լիբերալ պատգամավորներ հանդես են եկել Կանադայի Լիբերալ կուսակցության ղեկավարի պաշտոնից Թրյուդոյի հեռանալու օգտին։ Այդ օրը երեկոյան քաղաքական գործիչը հայտարարեց, որ մտադիր չէ հեռանալ պաշտոնից։
Դեկտեմբերի վերջին Կանադայի Նոր Դեմոկրատական կուսակցության առաջնորդ, նախկինում Թրյուդոյին հավատարիմ Ջագմիթ Սինգհը նույնպես խոստացավ, որ 2025 թվականին իր կուսակցությունը կողմ կքվեարկի կառավարության հրաժարականին, ինչին վաղուց էր ձգտում գլխավոր ընդդիմադիր ուժը՝ Կանադայի Պահպանողական կուսակցությունը։
