Անհնար է, որ քննիչի աշխատանքից բողոք չլինի. քննիչներն անցնելու են բարեվարքության ստուգումներ. Արգիշտի Քյարամյան
ՀՀ քննչական կոմիտեի նախագահ Արգիշտի Քյարամյանի կարծիքով՝ անհնար է, որ քննիչի աշխատանքից բողոք չլինի։
«Ցանկացած գործում երկու կողմ կա, ցանկացած լուծման պարագայում կողմերից մեկը միշտ դժգոհ է՝ թե՛ սուբյեկտիվ, թե՛ օբյեկտիվ պատճառներով, բայց դժգոհությունը միշտ կա»,- ԱԺ-ում 2025 թվականի պետական բյուջեի նախագծի քննարկման ժամանակ ասաց նա։
ՔԿ նախագահի խոսքով՝ այս տարվանից սկսկած՝ Կոռուպցիայի կանխարգելման հանձնաժողովում քննիչներն անցնելու են բարեվարքության ստուգումներ։
«Եթե չեմ սխալվում՝ արդեն երեք փուլ իրացվել է, բոլոր այն քննիչները, ովքեր հերթական ատեստավորումն են անցնելու ու բոլոր այն քննիչները, ովքեր պետք է ընդգրկվեն առաջխաղացման ցուցակում, պարտադիր բարեվարքության ստուգում են անցնում»,- ասաց Քյարամյանը։
Բոլոր այն դեպքերում, երբ բարեվարքության ստուգումը քննիչները ձախողում են, կա իմպերատիվ օրենքի կարգավորում, որ ՔԿ ներքին անվտանգության վարչությունում կարգապահական վարույթ է նախաձեռնվում, վարույթի քննությամբ մինչև պաշտոնից ազատում տույժ կարող է տրվել։
