Մադրիդի դատարանը Իսպանիայի վարչապետի կնոջը նոր մեղադրանք է ներկայացրել
Մադրիդի բարձրագույն դատարանը վարչապետ Պեդրո Սանչեսի կնոջը՝ Բեգոնիա Գոմեսին մեղադրանք է առաջադրել նոր հանցագործության առթիվ՝ դրանով իսկ ընդլայնելով նրա դեմ գործը։ Այդ մասին տեղեկացնում է «ՌԻԱ Նովոստի»-ն։
«Դատավոր Խուան Կառլոս Պեյնադոն նոր մեղադրանք է առաջադրել վարչապետի կնոջը, ով յուրացրել է Մադրիդի Կոմպլուտենսե համալսարանի մագիստրատուրայի ծրագրային ապահովման համար հատկացված գումարները»,- նշվում է հաղորդագրության մեջ։
Այդ կապակցությամբ Գոմեսն ավելի վաղ կանչվել էր ցուցմունք տալու։ Իսպանական դատարանը վարույթ է ընդունել վարչապետի կնոջ դեմ ներկայացված հայցը, որը ներկայացրել է ծայրահեղ աջակողմյան Hazte Oir կազմակերպությունը։
Մադրիդի բարձրագույն դատարանը մերժել էր վարչապետ Սանչեսի հայցն ընդդեմ դատավոր Պեյնադոյի։ Դատարանը անհիմն էր համարել հայցը, որով վարչապետը Պեյնադոյին մեղադրել է դատական չարաշահումների մեջ։ Սանչեսի բողոքը վերաբերում էր դատարանի՝ իր ցուցմունքն անձամբ ընդունելու որոշմանը, այլ ոչ գրավոր, ինչպես պահանջում էր կառավարության նախագահը։
