Փաշինյանի համար «Քաղաքացու օրը» տոնը նվիրված է Ազգային ինքնության պահպանմանը

2025 թվականի բյուջեով Փաշինյանի աշխատակազմին նախատեսված է հատկացնել 24 միլիարդ 365.7 մլն դրամ։ Այս գումարն այդ աշխատակազմը ծախսելու է մի շարք ուղղություններով` մասնավորապես,

– Հատկացվելիք միջոցներից Տեսչական վերահսկողության ծրագրին կտրվի 7,248.7 մլն դրամ:

– Հասարակական և այլ կազմակերպությունների, որպես աջակցություն, կհատկացվի 75.9 մլն:

Նշենք, որ այս ծրագրի նպատակն է նպաստել քաղաքացիական հասարակության զարգացմանը: Ծրագրի շրջանակներում հատկացումներն ուղղվելու են պետական կառավարման գործընթացներին քաղաքացիական հասարակության մասնակցության ապահովմանը, հասարակական կազմակերպություններին, ազգային փոքրամասնություններին աջակցմանը:

– Հանրային իրազեկում ծրագրի գծով նախատեսվել է հատկացնել 1,263.5 մլն դրամ:

Ծրագրով նախատեսված հատկացումներն ուղղվելու են հանրային իրազեկման ապահովմանը, ՀՀ վերաբերյալ պաշտոնական տեղեկատվության ապահովմանը նաև միջազգային հարթակներում, «Միր» միջպետական հեռուստառադիոընկերության ՀՀ մասնաբաժնի վճարմանը, տեղեկատվության ձեռքբերման, պահպանման և արխիվացման ծառայությունների իրականացմանը:

Ուշագրավ է, որ տոների և հիշատակի օրերի ծրագրի գծով հատկացվելիք 202.5 մլն դրամը Փաշինյանի աշխատակազմը նախատեսում է ծախսել ընդամենը 2 միջոցառման համար։

Ծրագրի շրջանակներում հատկացումները կուղղվեն «Քաղաքացու օրվան» նվիրված և «Մեր ժամանակների հերոսը» միջոցառումներին՝ ուշադրություն՝ որպես ի նպաստ Ազգային ինքնության պահպանման:

Թե, օրինակ, ինչ կապ ունի «Քաղաքացու օր» տոնն Ազգային ինքնության պահպանման հետ, Փաշինյանի աշխատակազմը չի հիմնավորել։