Ճապոնիայի իշխող կուսակցության նոր ղեկավարը խորհրդարանական ընտրությունները կհայտարարի հոկտեմբերի 27-ին

Ճապոնիայի իշխող Լիբերալ-դեմոկրատական ​​կուսակցության (ԼԴԿ) ընտրված նախագահ Սիգերու Իսիբան մամուլի ասուլիսի ժամանակ հայտարարել է հոկտեմբերի 27-ին խորհրդարանական ընտրություններ կազմակերպելու պլանների մասին։ Այս մասին հաղորդում է Kyodo գործակալությունը։«Նոր վարչակազմը պետք է հնարավորինս շուտ ստանա հանրության վճիռը: Եթե պայմանները թույլ տան, ես կցանկանայի հաջորդ համընդհանուր ​​ընտրություններն անցկացնել հոկտեմբերի 27-ին», – ասել է նա:

Ակնկալվում է, որ նախընտրական քարոզարշավը կմեկնարկի հոկտեմբերի 15-ին։Հոկտեմբերի 1-ին խորհրդարանը, որի երկու պալատները վերահսկում են ԼԴԿ-ն և նրա դաշնակից «Կոմեյտո» կուսակցությունը, արտահերթ նիստում Իսիբային կընտրի վարչապետ։

Սեպտեմբերի 30-ին Իսիբան նորացրեց ԼԴԿ-ում ղեկավար պաշտոնների կազմը։ Նախկին վարչապետ Յոսիհիդե Սուգան դարձավ կուսակցության փոխնախագահ, իսկ նախկին վարչապետ Տարո Ասոն՝ նախագահի խորհրդական: 

Տարիների ընթացքում 67-ամյա Իսիբան զբաղեցրել է պաշտպանության նախարարի, գյուղատնտեսության նախարարի և ԼԴԿ-ի գլխավոր քարտուղարի պաշտոնները։ Նրան հաջողվեց կուսակցության նախագահ դառնալ հինգերորդ փորձից։

Օգոստոսին Ճապոնիայի վարչապետ և ԼԴԿ-ի նախագահ Ֆումիո Կիսիդան հայտարարել էր, որ սեպտեմբերին կայանալիք կուսակցության առաջնորդի ընտրություններում չի առաջադրի իր թեկնածությունը երկրորդ ժամկետի համար։