Մյանմայում շուրջ 400 մարդ հեղեղումների զոհ է դարձել
Մյանմայում շուրջ 400 մարդ է զոհվել, 89-ը՝ անհետ կորել երկրի տարբեր տարածաշրջաններում «Յագի» թայֆունի առաջացրած հեղեղումների հետևանքով։ Այս մասին հաղորդում է ՏԱՍՍ-ը՝ վկայակոչելով երկրի Պետական վարչական խորհրդի լրատվական տեղեկագիրը։
«Հորդառատ անձրևների հետևանքով առաջացած հեղեղումներն ինը տարածաշրջաններում ու նահանգներում վնաս են հասցրել 54 բնակավայրերի, որոնք կազմում են երկրի 330 բնակավայրերի մեկ վեցերորդը կամ 16 %-ը», – ասվում է հաղորդագրության մեջ:
Մյանմայում անձրևների սեզոնին, որը երկրում տևում է մայիսից մինչև նոյեմբեր, հաճախ են տեղի ունենում հեղեղումներ և սողանքներ: Այս ժամանակաշրջանում գետերը դուրս են գալիս ափերից՝ ջրածածկ անելով բնակավայրերը: Ընդհանուր առմամբ, երկրի տարբեր տարածաշրջաններում տարերքն ամբողջովին ավերել է ավելի քան 2 000 տուն, շուրջ 3500 տուն վնասվել է։
Մի քանի հարյուր հազար մարդ տարհանվել է։
