Լուկաշենկոն Իրանի նախագահին հրավիրել է Բելառուս

Բելառուսի նախագահ Ալեքսանդր Լուկաշենկոն հանդիպել է Իրանի Ազգային անվտանգության բարձրագույն խորհրդի քարտուղար Ալի Աքբար Ահմադիանի հետ։

BelTA գործակալությունը հաղորդում է, որ հանդիպման ժամանակ Լուկաշենկոն Բելառուս այց կատարելու հրավեր է փոխանցել Իրանի իր պաշտոնակից Մասուդ Փեզեշքիանին։

«Իրանի ժողովուրդը բոլորովին վերջերս մեծ դժբախտություն ապրեց. զոհվեց ձեր նախագահը: Բայց դուք արիաբար անցաք այս շրջանը, դուք ընտրեցիք նոր նախագահ: Ես ձեզ շնորհավորում եմ այդ կապակցությամբ և ցանկանում եմ, որ ձեր նախագահին փոխանցեք, որ մենք նրան սպասում ենք Բելառուսում», – ասել է Լուկաշենկոն Ահմադիանին։

Mehr գործակալությունն իր հերթին հաղորդում է, որ Իրանի Ազգային անվտանգության բարձրագույն խորհրդի քարտուղարը Բելառուս է մեկնել իր պաշտոնակցի հրավերով։ Բելառուսի բարձրաստիճան պաշտոնյաների հետ քննարկման օրակարգում են երկկողմ հարաբերությունների բարելավումը՝ մասնավորապես տնտեսության ոլորտում։Բելառուս այցից առաջ Ահմադիանը Ռուսաստանում էր։