Եվրահանձնաժողովն անընդունելի է համարում միգրանտներին Բրյուսել ուղարկելու Հունգարիայի սպառնալիքները
Հունգարիայի իշխանությունների կողմից միգրանտներին Բրյուսել ուղարկելու սպառնալիքներն անընդունելի են. նման գործողությունները կխաթարեն Շենգենյան գոտու անվտանգությունը։ Այդ մասին Բրյուսելում կայացած մամուլի ասուլիսում հայտարարել է Եվրահանձնաժողովի ներկայացուցիչ Անիտա Հիպերը։
«Հունգարիայի իշխանությունների հայտարարությունը անօրինական միգրանտներին Բրյուսել ուղարկելու մտադրության վերաբերյալ, կարճ ասած, անընդունելի է: Նման գործողությունը կխախտի եվրոպական իրավունքը և փոխադարձ վստահության սկզբունքը, ինչպես նաև կխաթարի Շենգենյան գոտու անվտանգությունը», – նրա խոսքերն է փոխանցում ՏԱՍՍ-ը:
Ըստ Հիպերի՝ Եվրահանձնաժողովը ներկայում կապի մեջ է Հունգարիայի իշխանությունների հետ՝ «համոզվելու, որ նման գործողություններ չձեռնարկվեն»:
Հունգարիայի վարչապետի գրասենյակի ղեկավար Գերգելի Գուլյասը օգոստոսի 22-ին ասել էր, որ Բուդապեշտը պատրաստ է միգրանտներին ուղղակիորեն Բրյուսել ուղարկել, եթե Եվրամիությունը խանգարի Հունգարիային պայքարել անօրինական միգրանտների հոսքի դեմ։
