ԵՄ-ում պնդում են՝ Երևանն ու Բաքուն պիտի «խաղերն ավարտեն» ու կնքեն խաղաղության համաձայնագիրը. Politico
Եվրոպական խորհրդի նախագահ Շառլ Միշելը, Հարավային Կովկասում լարվածության աճի ֆոնին, վերսկսում է ջանքերը՝ տարածաշրջանում կայուն խաղաղություն հաստատելու ուղղությամբ:
Politico-ի հետ զրույցում երկու բարձրաստիճան դիվանագետ հաստատել է, որ Միշելը երկկողմ հանդիպումներ է ունեցել Հայաստանի ու Ադրբեջանի ղեկավարների հետ Մեծ Բրիտանիայում՝ Եվրոպական քաղաքական համայնքի գագաթնաժողովի շրջանակներում:
Եվրոպական խորհրդի նախագահը նաև նամակ է գրել կողմերին՝ կոչ անելով վերադառնալ բանակցություններին, «ավարտուն տեսքի բերել խաղաղության համաձայնագիրը», և առաջընթաց գրանցել չլուծված հարցերի շուրջ, որոնցից մեկը սահմանազատումն է:
Բրյուսելում աճում է հիասթափությունը դիվանագիտական փակուղուց: Չնայած Միշելի հետ հանդիպումներին, Նիկոլ Փաշինյանը և Իլհամ Ալիևը չպայմանավորվեցին հանդիպման մասին: Երևանն ու Բաքուն իրար էին մեղադրում դրա չկայանալու համար:
«Վերջիվերջո, երկու կողմերն էլ պետք է դադարեցնեն խաղերը և կնքեն համաձայնագիրը, քանի որ նախագահ Միշելն արել է ԵՄ-ի հնարավորության սահմաններում ամենը՝ խաղաղության համաձայնագրին հասնելու համար», – ըստ «Ազատության»՝ ասել է Միշելին մոտ կանգնած ԵՄ բարձրաստիճան դիվանագետը:
Գործընթացն ընթանում է Ադրբեջանի կողմից Լեռնային Ղարաբաղը ռազմական ուժով գրավելուց ու 100 հազար հայերի գաղթից 9 ամիս անց, գրում է պարբերականը:
Ռազմական գործողությունները տեղի ունեցան «Միշելի կողմից կազմակերպված, ամիսներ տևած բանակցություններից հետո՝ չնայած Արևմուտքի նախազգուշացումներին, որ միայն դիվանագիտական լուծումը կարող է խաղաղություն բերել տարածաշրջանում»,- ընդգծում է Politico-ն:
Այժմ, լարվածությունը կրկին աճում է: Բաքուն անցյալ շաբաթ մեղադրել է Հայաստանին երկու երկրների ընդհանուր սահմանի երկայնքով «սադրանքներ կատարելու» մեջ և սպառնացել է «անհրաժեշտ պատասխան միջոցներ ձեռնարկել՝ օգտագործելով իրենց տրամադրության տակ եղած ողջ զինանոցն ինքնապաշտպանության նպատակով»։ Հայաստանը շեշտում է՝ Բաքվի պնդումներն ապատեղեկատվություն են:
