Նեթանյահուն Լիբանանի տարածքից հրթիռակոծությունից հետո անվտանգության կաբինետի նիստ է հրավիրել. «Հեզբոլլահ»-ին նախազգուշացվել է «ծանր գին վճարելու» մասին
Իսրայելի վարչապետ Բենիամին Նեթանյահուն անվտանգության կաբինետի նիստ է հրավիրել՝ քննարկելու Իսրայելի արձագանքը Գոլանի բարձունքներում «Հեզբոլլահ»-ի մահացու հարվածին:
Նեթանյահուին միացել են պաշտպանության նախարար Յոավ Գալանտը, ազգային անվտանգության հարցերով խորհրդական Ցաչի Հանեգբին, Նեթանյահուի շտաբի պետ Ցաչի Բրավերմանը, Մոսադի ղեկավար Դեյվիդ Բարնեան, Իսրայելի պաշտպանության բանակի գլխավոր շտաբի այլ անդամներ և պաշտոնյաներ, գրում է The Times of Israel-ը:
Նշվում է, որ հրթիռն արձակվել է Լիբանանի տարածքից և ընկել Իսրայելի կողմից օկուպացված Գոլանի բարձունքներում գտնվող Մաջդալ Շամս գյուղի ֆուտբոլի դաշտ, ինչի հետևանքով զոհվել է 12 մարդ՝ հիմնականում 10-16 տարեկան երեխաներ և դեռահասներ: Հաղորդվում է 20 վիրավորի մասին:
Իսրայելը կատարվածի համար մեղադրել է լիբանանյան «Հեզբոլլահ» շարժմանը: Վարչապետ Բենիամին Նեթանյահուն նախազգուշացրել է, որ «Հեզբոլլահ»-ը «կվճարի ծանր գին, որը մինչ այժմ չի վճարել», մինչդեռ Իսրայելի պաշտպանության բանակի ղեկավար Հերզի Հալևին ասել է, որ հարձակումը «կհանգեցնի շատ, շատ նշանակալի արձագանքի»:
«Հեզբոլլահ»-ի գլխավոր խոսնակ Մուհամմեդ Աֆիֆն ասել է, որ շարժումը «կտրականապես հերքում է Մաջդալ Շամսի վրա հարձակման իրականացումը»:
