Իսպանացի հնագետները Եվրոպայի ամենահին արխայիկ մարդկանց ոսկորներ են հայտնաբերել
Իսպանացի հնագետները հայտնաբերել են 850.000 տարի առաջ Սիեռա դե Ատապուերկա լեռնաշղթայում՝ Գրան Դոլինայում, ապրած Եվրոպայի ամենահին արխայիկ մարդկանց ոսկորները։ Այդ մասին ասվում է Մարդկային պալեէկոլոգիայի և սոցիալական հեղափոխության կատալոնական համալսարանի տարածած մամուլի հաղորդագրության մեջ։
«30 տարվա պեղումներից հետո Գրան Դոլինա տեղանքի պեղումների համար պատասխանատու հետազոտական թիմը կարողացավ ավելի խորը ներթափանցել TD6 բլոկի մակերեսը»,- ասվում է հրապարակման մեջ։
Մասնագետները նշել են, որ գանգի ոսկորների, կողերի և ողերի բեկորների մեջ եղել է նաև ատամ, որն առանձնահատուկ հետաքրքրություն է ներկայացնում։ Ենթադրվում է, որ այն պատկանում է 25-ամյա մի կնոջ, որի մնացորդները նախկինում հայտնաբերվել են տարածաշրջանում:
1990-ականներին Գրան Դոլինայի քարանձավներում հայտնաբերվել են նաև վեց մարդու մնացորդներ՝ խառնված կենդանիների ոսկորների և 780 հազար տարվա վաղեմության քարե գործիքների հետ։ Նրանք դասակարգվել են որպես Homo antecessor բրածո տեսակներ կամ մարդու նախորդներ:
