ՌԴ-ն, Իրանը, Ղազախստանը և Թուրքմենստանը ստորագրել են «Հյուսիս-Հարավ»-ի արևելյան երթուղու զարգացման ճանապարհային քարտեզը
Ռուսաստանը, Իրանը, Ղազախստանը և Թուրքմենստանը ստորագրել են 2024-2025 թվականների «Հյուսիս-Հարավ» տրանսպորտային միջանցքի արևելյան երթուղու ներուժի համաժամանակյա զարգացման ճանապարհային քարտեզը, հայտնում է News Central Asia-ն՝ հղում անելով Ղազախստանի տրանսպորտի նախարարությանը։
Այս փաստաթղթի իրականացումը մինչև 2027 թվականը միջանցքի թողունակությունը կհասցնի տարեկան 15 միլիոն տոննայի, իսկ մինչև 2030 թվականը՝ 20 միլիոն տոննայի։
«Ղազախստանը մտադիր է շարունակել իր ակտիվ մասնակցությունը «Հյուսիս-Հարավ» ՄՏՄ-ի արևելյան ճյուղի զարգացմանը, որն ունի մինչև 2030 թվականը բեռնափոխադրումների աճի ամենաբարձր ներուժը և ամենաանվտանգն է Հնդկական օվկիանոս ամենակարճ տարանցման համար: Ուստի անհրաժեշտ է սկսել Ղազախստանի, Ռուսաստանի, Թուրքմենստանի և Իրանի տարածքներով անցնող «Հյուսիս-հարավ» միջանցքի արևելյան երթուղու ներուժի համաժամանակյա զարգացման համար այսօր ստորագրված «Ճանապարհային քարտեզի» գործնական իրականացումը»,- նշել է տրանսպորտի նախարարության ղեկավար Մարատ Կարաբաևը։
Փաստաթղթի ստորագրումը տեղի է ունեցել «Հյուսիս-Հարավ» տրանսպորտային առևտրի և արտահանման առաջին համաժողովի շրջանակում, որն անցկացվել է Ակտաուում հուլիսի 19-ից 20-ը։
