«Գործակալների օրենքի» դեմ նախագահի հայցը ՍԴ-ում է
Վրաստանի Սահմանադրական դատարանը (ՍԴ) գրանցել է նախագահ Սալոմե Զուրաբիշվիլիի հայցը, որով նա պահանջում է չեղարկել «օտարերկրյա ազդեցության թափանցիկության մասին» օրենքը («գործակալների օրենք»)։ Այս մասին գրում է aliq.ge-ն։
Նշենք, որ նախագահի հայցը դատարան էր ներկայացվել երկուշաբթի օրը, նշվում է, որ օրենքի ընդունմամբ խախտվում են Վրաստանի Սահմանադրության 78-րդ հոդվածի դրույթները:
Հոդվածի համաձայն՝ սահմանադրական մարմինները պետք է ձեռնարկեն բոլոր միջոցները՝ ապահովելու Վրաստանի լիարժեք ինտեգրումը Եվրամիությանն ու Հյուսիսատլանտյան դաշինքին։
Զուրաբիշվիլին պահանջում է նաև դադարեցնել օրենքի կիրարկումը մինչև քննարկման ավարտը։
Հիշեցնենք, որ մայիսի 28-ին Վրաստանի խորհրդարանը հաղթահարեց նախագահի վետոն «օտարերկրյա ազդեցության թափանցիկության» օրենքի վերաբերյալ։ Սույն օրենքը օտարերկրյա ազդեցության շահերի կրողներ է հռչակում բոլոր այն հասարակական և մեդիա կազմակերպություններին, որոնք օտար երկրից ֆինանսավորում են ստանում, ընդհուպ՝ երկրի ռազմավարական գործընկերներից։
Օրենքի ընդունումից հետո Եվրամիությունն արդեն դադարեցրել է Վրաստանին տրամադրվող օգնության մի մասը, ԱՄՆ-ն անորոշ ժամկետով հետաձգել է ռազմական պատրաստությունը։ Սահմանադրական դատարան հայց են ներկայացրել նաև հասարակական և լրատվական կազմակերպությունները։ Վրաստանի խորհրդարանի ընդդիմադիր պատգամավորները նույնպես պատրաստվում են դիմել դատարան։
