Ընդերքի պահպանման և օգտագործման օրենսդրական պահանջները խախտած ընկերություններն ամբողջությամբ վերականգնել են պետությանը պատճառած վնասը. դատախազություն
Դատախազը ընդերքի պահպանման և օգտագործման օրենսդրական պահանջները խախտած ընկերությունների երկու տնօրենների վերաբերյալ գործն ուղարկել է դատարան: Այս մասին հայտնում են Գլխավոր դատախազությունից, նշելով, որ վերականգնվել է պետությանը պատճառված վնասը:
Գլխավոր դատախազությունը 2023 թվականի դեկտեմբերի 27-ին տեղեկացրել էր, որ հանրային քրեական հետապնդումներ են հարուցվել ընդերք օգտագործող ընկերության՝ տարբեր տարիներին տնօրենի պաշտոնը զբաղեցրած երկու անձի՝ Ա.Զ.-ի և Հ.Գ.-ի նկատմամբ՝ ընդերքի պահպանման և օգտագործման օրենսդրական պահանջները խախտելու, հողը փչացնելու համար, որի հետևանքով պետությանը պատճառվել է առանձնապես խոշոր չափերով գույքային և այլ էական վնաս:
2023 թվականի դեկտեմբերի 27-ին ընկերության կողմից ամբողջությամբ վերականգնվել է պետությանը պատճառված՝ առանձնապես խոշոր չափերով՝ 43 մլն 583 հազար 300 դրամ վնասը:
«Դատախազը 2024 թվականի փետրվարի 13-ին հաստատել է Ա.Զ.-ի և Հ.Գ.-ի վերաբերյալ կազմված մեղադրական եզրակացությունը և վարույթի նյութերի հետ հանձնել Արարատի և Վայոց ձորի մարզերի առաջին ատյանի ընդհանուր իրավասության դատարան»,- ասված է դատախազության տարածած հաղորդագրության մեջ:
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
