63-ամյա տղամարդը հայտնել է, որ զենք-զինամթերքը պատկանել է հանգուցյալ հորը
ՆԳՆ ոստիկանության Վաղարշապատի բաժնի համայնքային ոստիկաները ստացված օպերատիվ տվյալներն իրացրին փետրվարի 5-ին: Ըստ տեղեկությունների՝ Տարոնիկ գյուղի 63-ամյա մի բնակիչ տանը, տնամերձ հողամասում և կից օժանդակ շինություններում պահում է զենք-զինամթերք, նաև ունի կանեփի չոր զանգված:
Տեղեկությունը ստուգելու նպատակով ոստիկաններն այցելել են Տարոնիկ գյուղի նշված տուն: Տանտերը հայտնել է, որ ունի զենք-զինամթերք և անձնական օգտագործման համար մարիխուանա, որոնք պատրաստ է ներկայացնել:
Վաղարշապատի քննչական բաժնում նախաձեռնված քրեական վարույթի շրջանակում կատարված զննությամբ հայտնաբերվել է 16 մմ տրամաչափի երկփողանի որսորդական հրացան՝ առանց համապատասխան փաստաթղթի, պայթուցիկ նյութ, փամփուշտներ, մարիխուանայի նմանվող զանգված և այլն:
63-ամյա տղամարդը հայտնել է, որ զենք-զինամթերքը պատկանել է հանգուցյալ հորը, իսկ թմրանյութը անձնական օգտագործման համար պատրաստել է իր աճեցրած կանեփից:
Կազմված փաստաթղթերն ուղարկվել են Վաղարշապատի քննչական բաժին:
