Ռուսաստանն անցանկալի անձ է հայտարարել ԱՄՆ դեսպանատան երկու աշխատակցի․ ՌԴ ԱԳՆ
Ռուսաստանը անցանկալի անձ է հայտարարել ԱՄՆ դեսպանատան երկու աշխատակիցների: ՌԻԱ Նովոստիի հաղորդմամբ՝ տեղեկությունը հայտնել են Ռուսաստանի ԱԳՆ-ից:
«Սեպտեմբերի 14-ին Ռուսաստանի ԱԳՆ կանչված Մոսկվայում ԱՄՆ դեսպան Լին Թրեյսիին պաշտոնական նոտա է հանձնվել՝ ԱՄՆ դեսպանատան առաջին քարտուղար Ջ.Սիլինի և դեսպանատան երկրորդ քարտուղար Դ․Բերնստեյնի գործողությունների՝ դիվանագիտական կարգավիճակի հետ անհամատեղելիության վերաբերյալ», – հայտարարել են դիվանագիտական գերատեսչությունից ՝ նշելով, որ դիվանագետները պետք է 7 օրվա ընթացքում լքեն Ռուսաստանի տարածքը persona non grata կարգավիճակով։
ԱԳՆ–ի տվյալներով՝ ամերիկացի դիվանագետները կապ են պահպանել ԱՄՆ-ի իրազեկիչ և ամերիկյան հյուպատոսության նախկին աշխատակից Ռոբերտ Շոնովի հետ:
«Նշված անձինք ապօրինի գործունեություն են ծավալել՝ կապ պահպանելով օտարերկրյա պետության հետ գաղտնի համագործակցության մեջ մեղադրվող Ռուսաստանի քաղաքացի Ռ.Շոնովի հետ, որին նյութական վարձատրության դիմաց հանձնարարություններ են տվել, որոնք նպատակ ունեին վնաս հասցնել Ռուսաստանի Դաշնության ազգային անվտանգությանը», – նշել են նախարարությունից։
ԱԳՆ-ից ավելացրել է, որ Ռուսաստանն ակնկալում է, որ ԱՄՆ-ում ճիշտ հետևություններ կանեն երկու դիվանագետների արտաքսումից հետո և զերծ կմնան առճակատումից։
Ընդգծվել է, որ ԱՄՆ դիվանագիտական ներկայացուցչության հակաիրավական ակտիվությունը, ներառյալ միջամտությունը երկրի ներքին գործերին, անթույլատրելի է և վճռականորեն կկասեցվի:
