Ծառայողական 006 LL 50 պետհամարանիշով ավտոմեքենայի արտոնյալ շահագործողը կամ ամենակարող Արայիկի Հովոն

Գաղտնիք չէ, որ Կառավարական Տուն 1 շենքի (Կառավարության շենք) բակ մեքենայով անարգել մուտք գործելու և այնտեղ կայանելու իրավունք ունեն միայն բարձրաստիճան սահմանափակ թվով պաշտոնատար անձինք՝ վարչապետը, փոխվարչապետերը, վարչապետի աշխատակազմի ղեկավարը և մի քանի այլ պաշտոնյա։ Այս անձանց ցանկում, սակայն, որևէ կերպ վարչապետի աշխատակազմի ղեկավարի օգնականը, բնականաբար, չի մտնում ու չի կարող մտնել, սակայն, իհարկե, դա Նիկոլ Փաշինյանի մտերիմ ՔՊ-ական Արայիկ Հարությունյանի հովանավորյալներին չի վերաբերում:

Կառավարությանը մոտ կանգնած 168.am-ի աղբյուրների փոխանցմամբ՝ Նիկոլ Փաշինյանի աշխատակազմի ղեկավար Արայիկ Հարությունյանի արտոնյալ օգնական Հովհաննես Պողոսյանը 006 LL 50 օպերատիվ համարանիշով «Prado» մակնիշի ծառայողական մեքենայով անարգել մուտք է գործում Կառավարության բակ և այնտեղ կայանում։ Ընդամենը հիշեցնենք, որ օպերատիվ համարներով երթևեկությունը նշանակում է իրավունք ունենալ վարել առանց տուգանվելու՝ դրանից բխող բոլոր հետևանքներով:

Հիշեցնենք նաև, որ Հովհաննես Պողոսյանն էր Արայիկ Հարությունյանի մասնակցությամբ հայտնի գլենդելյան միջադեպի ժամանակ նրան ուղեկցող անձը, երբ Գլենդելի Ամերիկանա կենտրոնական թաղամասի Glendale Galleria-ում Iphone-ի վաճառքով զբաղվող խանութներից մեկում մի խումբ հայ երիտասարդներ մոտեցել էին Արայիկ Հարությունյանին, բղավել՝«դավաճա՛ն», «անհայրենի՛ք», և հեռացել։

Մեզ ասացին՝ Հովհաննես Պողոսյանն օգտվում է Արայիկ Հարությունյանի լիակատար հովանավորությունից և վարչապետի աշխատակազմում իրականացնում է ստվերային ղեկավարում։

Մեր տեղեկություններով՝ անգամ շատ նախարարներ, Արայիկ Հարությունյանի տեղակալները, այդ թվում՝ Նիկոլ Փաշինյանի սիրելի Տարոն Չախոյանը, չեն կարող մեքենայով մուտք գործել Կառավարության շենք և այնտեղ կայանել, բայց Հովհաննես Պողոսյանին դա թույլ են տալիս անել։ Նման արտոնություններից չեն օգտվում անգամ վարչապետի խորհրդականները և օգնականները՝ բացառությամբ նախկին փոխվարչապետ, այժմ վարչապետի գլխավոր խորհրդական Համբարձում Մաթևոսյանի, որը ևս անարգել մուտք է գործում Կառավարության շենք և այնտեղ կայանում։

006 ԼԼ 50 համարանիշով խորհրդավոր «Prado»-ն

Հովհաննես Պողոսյանը 006 ԼԼ 50 համարանիշով «Prado» մակնիշի մեքենան օգտագործում է հիմնականում անձնական նպատակներով, քանի որ Արայիկ Հարությունյանը ունի այլ ծառայողական մեքենա՝ 004 ԼԼ 55 համարանիշով, և այլ վարորդ՝ Պետրոս Մովսեսյան անունով։ Այսինքն՝ Հովհաննես Պողոսյանը Արայիկ Հարությունյանի վարորդը չէ, նրա վարորդն է եղել ԿԳՄՍ նախարար եղած ժամանակ:

Մյուս կողմից՝ Հովհաննես Պողոսյանին, ՀՀ օրենսդրության համաձայն, ծառայողական մեքենա հատկացվել չի կարող, հետևաբար ի՞նչ մեքենա է սպասարկում Հովհաննես Պողոսյանին: Իսկ հնարավո՞ր է, որ այդ մեքենան էլ է Արայիկ Հարությունյանի ծառայողական ավտոմեքենան, ու վերջինս այն տրամադրել է իր մտերմին, և եթե դա այդպես է, դա Արայիկ Հարությունյանի կողմից առերևույթ առկա իշխանական լիազորությունների չարաշահման հանգամանքի մասին է խոսում:

Հովհաննես Պողոսյանն այն անձանցից է, ով Արայիկ Հարությունյանի սենյակ ունի անարգել մուտքի իրավունք, և կադրային հարցերը Արայիկ Հարությունյանը քննարկում է վերջինիս հետ՝ ի հեճուկս այն հանգամանքի, որ կադրերի վարչության աշխատանքները համակարգում է Արայիկ Հարությունյանի նախկին մտերիմ, այժմ՝ Փաշինյանի աշխատակազմի ղեկավարի տեղակալ Արթուր Հովսեփյանը, որը, ըստ շրջանառվող լուրերի, խիստ զբաղված է արտասահմանյան գործուղումների կազմակերպմամբ. (երևի եկամտաբեր է)։

Հովհաննես Պողոսյանը (կամ, ինչպես վարչապետի աշխատակազմում են ասում, Արայիկի Հովոն) Արայիկ Հարությունյանին ուղեկցում է ամենուր, անգամ արտասահմանյան գործուղումների ժամանակ և, որ ամենահետաքրքիրն է, նույնիսկ արձակուրդում գտնվելիս։

Ի դեպ, նշենք նաև, որ ժողովրդավարության բաստիոն համարվող ՀՀ-ում Արայիկ Հարությունյանի գործուղման և արձակուրդի որոշումները չեն հրապարակվում։ Հովհաննես Պողոսյանը Հարությունյանի հետ մի քանի անգամ արձակուրդ է մեկնել ԱՄՆ, այնտեղ նշել ծննդյան տարեդարձը, տարբեր գործուղումների է գնացել վերջինիս հետ, բնականաբար, պետական բյուջեի հաշվին թերևս։

Հովհաննես Պողոսյանը, թեև իրավունք չունի մասնակցելու Կառավարության նիստերին, սակայն մասնակցում է դրանց։ Վարչական պաշտոն զբաղեցնող անձի՝ վարչապետի աշխատակազմի ղեկավարի օգնականին նման լիազորություններ և գործառույթներ վերապահելը ուղղակի անհամատեղելի է իրավական և ժողովրդավարական պետության հետ, բայց այս ամենը կատարվում է հենց Նիկոլ Փաշինյանի գիտությամբ և նրա քթի տակ։

Իսկ հիմա պատկերացրեք, թե ինչ կաներ ընդդիմադիր Նիկոլը, եթե Արայիկի Հովոյի արկածները տեղի ունենային նախկինների օրոք։