Միջուկային զենք կրելու ունակ ամերիկյան նոր կործանիչները Մեծ Բրիտանիայում կտեղակայվեն այս տարի
Նոր ամերիկյան F-35A կործանիչները, որոնք կարող են միջուկային զենք կրել, Մեծ Բրիտանիայում կսկսեն տեղակայել արդեն այս տարի։ Այս մասին հաղորդում է The Telegraph հրատարակությունը՝ հղում անելով աղբյուրների:
Պարբերականի տվյալներով՝ ինքնաթիռների երկու էսկադրիլիաներն առաջիկայում կժամանեն ԱՄՆ-ի ռազմաօդային ուժերի վարձակալած «Լեյքենհիթ» ռազմակայան՝ Սաֆոլքի կոմսությունում։
54 F-35 կործանիչները կփոխարինեն ներկայում ավիաբազայում գտնվող F-15-երին, որոնք կարող են միջուկային զենք կրել, սակայն ավելի պակաս ժամանակակից են։ Աղբյուրները կործանիչները փոխարինելու քայլն անվանել են «նշանակալի»։
The Telegraph-ը նշում է, որ ըստ ավելի վաղ հրապարակված որոշ պաշտոնական փաստաթղթերի՝ ԱՄՆ Կոնգրեսն ստացել է 50 միլիոն դոլարի ռազմաօդային ուժերի բյուջետային հարցում` ամերիկյան ավիաբազայում «երաշխիքային հանրակացարան» կառուցելու համար։ Պարբերականը պարզաբանում է, որ «երաշխիքային» տերմինն օգտագործվում է ԱՄՆ-ի ռազմական բառապաշարում՝ նշելու այն օբյեկտները, որոնք կապված են միջուկային զենքի հետ։
Մինչև 2008 թ.-ը ավիաբազայում պահվում էր ամերիկյան 110 միջուկային ռումբ, որոնք դուրս են բերվել միջուկային պատերազմի սպառնալիքի մակարդակի նվազումից հետո։
