Ֆրանսիան 200մլն եվրո կծախսի խաղողի այգիները հատելու և գինու արտադրությունը կրճատելու համար
Ֆրանսիայի կառավարությունը հայտարարել է, որ 200 մլն եվրո կծախսի արտադրողներին աջակցելու և խաղողի այգիները հատելու համար։ Այս մասին գրում է France 24-ը:
Ֆրանսիայի մի քանի խոշոր գինեգործական շրջաններ, հատկապես Բորդոյի հայտնի շրջանը, դժվարություններ ունեն սպառման փոփոխության ու Covid-19-ի հետևանքների հետ կապված բարդ խնդիրների պատճառով:
Տեղական ֆերմերների միության տվյալներով՝ գինու պահանջարկի անկումը հանգեցրել է գերարտադրության, գների կտրուկ անկման, և Բորդոյի տարածաշրջանի յուրաքանչյուր երրորդ գինեգործի համար ֆինանսական լուրջ դժվարություններ են առաջ եկել:
Այդ նպատակով 160 մլն եվրոյի չափով նախնական գումարը Ֆրանսիայի կառավարության կողմից ավելացվել է մինչև 200 մլն եվրոյի: Այս մասին լրագրողներին հայտնել է գյուղատնտեսության նախարար Մարկ Ֆեսնոն:
Գումարն ուղղվել է գների անկումը կանգնեցնելուն և գինեգործներին եկամտի աղբյուրներ գտնելուն հնարավորություն տալուն։ Միևնույն ժամանակ, նախարարն ընդգծել է, որ արդյունաբերությունը պետք է «նայի դեպի ապագա, մտածի սպառման փոփոխությունների մասին… և հարմարվի»:
Հարավ–արևմտյան Լանգեդոկ շրջանը՝ երկրի ամենամեծ գինեգործական մասը, որը հայտնի է իր հարուստ կարմիր գինիներով, նույնպես մեծապես տուժել է այս ալկոհոլային խմիչքի պահանջարկի անկումից:
«Մենք չափազանց շատ ենք արտադրում, իսկ վաճառքի գինը ցածր է արտադրության գնից, ուստի գումար ենք կորցնում», — AFP-ին ասել է Լանգեդոկ գինու արտադրողների ասոցիացիայի խոսնակ Ժան-Ֆիլիպ Գրանիեն:
Գյուղատնտեսության նախարարությունը նաև հունիսին հայտարարել է, որ 57 միլիոն եվրո է հատկացնում Բորդոյի շրջանում շուրջ 9500 հեկտար խաղողի այգիների հատումը ֆինանսավորելու համար, մինչդեռ պետական այլ միջոցներ հասանելի են այլ մթերքի, օրինակ՝ ձիթապտղի արտադրությունը խրախուսելու համար:
Հունիսին, հաստատելով արտակարգ օգնությունը ոլորտին, Եվրահանձնաժողովը հայտարարել է, որ այս տարի գինու սպառումը նվազել է 7%- ով Իտալիայում, 10%-ով Իսպանիայում, 15%-ով Ֆրանսիայում, 22% -ով Գերմանիայում և 34%-ով Պորտուգալիայում:
Հանձնաժողովը հայտնել է, որ ամենից շատ տուժել են խաղողի այգիները, որոնք կարմիր և վարդագույն գինիներ են արտադրում Ֆրանսիայի, Իսպանիայի ու Պորտուգալիայի որոշ շրջաններում:
