«Մերձավան քար էր տեղափոխել ու վերադառնում էր տուն». ողբերգական վթարի մասնակից «ԶԻԼ»-ի վարորդի վիճակը կայուն ծանր է. 24news.am
Երեկ Երևան-Գյումրի ավտոճանապարհին տեղի ունեցած ողբերգական ավտովթարի հետևանքով վիրավորների վիճակը շարունակում է ծանր մնալ: Մասնավորապես, «ԶԻԼ» բեռնատար մեքենայի վարորդի վիճակը կայուն ծանր է։ Այս մասին 24News-ին պատմեցին վարորդի հարազատները:
Նրանց խոսքով, այդ օրը Հ. Պ-ն ալկոհոլի ազդեցության տակ չի եղել, զննություն է անցել, նաև նշեցին` առհասարակ ալկոհոլ չի օգտագործում: «13-14 տարվա վարորդ է, 9 տարի էլ «ԶԻԼ» է վարում: Մերձավան քար էր տեղափոխել ու վերադառնում էր տուն: Լույսը միանգամից ընկել է աչքերին ու չի հասցրել անգամ արգելակի»,- ողբերգության իրենց տարբերակն են ներկայացրել նրանք։
«ԶԻԼ»-ի վարորդը, հարազատների պատմելով, տարբեր վնասվածքներ է ստացել` կոնքի, կրծքավանդակի, թոքի, գլխի վրա պատռվածք է ունեցել՝ կարեր են դրել:
24News-ի ոստիկանության աղբյուրների փոխանցմամբ, ծառայողական քննություն է նշանակվել այդ տարածքում պարեկային հերթապահություն իրականացնող ծառայողների նկատմամբ:
Հիշեցնենք, որ օգոստոսի 14-ի գիշերը, Երևան-Գյումրի ավտոճանապարհին՝ Լանջիկ գյուղի մոտակայքում, բախվել են «Volkswagen» մակնիշի ուղևորափոխադրող միկրոավտոբուսը և «ZIL» մակնիշի բեռնատարը։ Զոհվել է 11 քաղաքացի, այդ թվում՝ միկրոավտոբուսի վարորդը և «Համշեն տուրի» զբոսավարը, ծանր վիրավորել՝ 6-ը։ Տուժածներից 5-ը վերակենդանացման բաժանմունքում են, նրանցից 4-ի վիճակը ծանր է, մեկինը` ծայրահեղ ծանր:
Ողբերգական վթարի ուղեւորները վերադառնում էին Արեւմտյան Հայաստան ուղեւորությունից։
