Երևանի քաղաքապետարանը չի հերքում՝ «Մհեր Մկրտչյան» թատրոնի տնօրենի պաշտոնի համար դիտարկվում է Սոս Ջանիբեկյանի թեկնածությունը
Երևանի քաղաքապետարանն արձագանքել է տարածվող լուրերին, թե դերասան Սոս Ջանիբեկյանը կնշանակվի «Մհեր Մկրտչյան» արտիստական թատրոնի տնօրեն։
«Արմենպրես»-ի թղթակցի հետ զրույցում Երևանի քաղաքապետի մամուլի քարտուղար Հայկ Կոստանյանը նշեց, որ թատրոնի տնօրենի նշանակման համար նախ պետք է մրցույթ հայտարարվի, թեկնածուները պետք է մասնակցեն մրցույթին, իսկ հաղթողը Երևանի քաղաքապետի որոշմամբ ստանձնի տնօրենի պարտականությունները:
«Դեռ մրցույթ չկա, չկա նաև մասնակիցների ցանկ, ուստի այն տեղեկությունները, թե Սոս Ջանիբեկյանը նշանակվել է «Մհեր Մկրտչյան» թատրոնի տնօրեն, չի համապատասխանում իրականությանը»,- նշեց Կոստանյանը և չհերքեց՝ Ջանիբեկյանի թեկնածության վերաբերյալ քննարկումներ կան:
Անդրադառնալով մրցույթի հայտարարման ժամկետներին՝ Կոստանյանն ասաց՝ ժամկետներ դեռ չեն նախանշվում:
Հիշեցնենք, որ Սոս Ջանիբեկյանը 2018թ. մինչ օրս սատարում է Նիկոլ Փաշինյանին և համարվում է վերջինիս թիմի անդամ։ Այսինքն՝ «Մհեր Մկրտչյան» արտիստական թատրոնի տնօրենի պաշտոնում իշխանությունները ևս ցանկանում են նշանակել յուրայիններին։
