Դաշնակահար Դմիտրի Մասլեևը վարպետության դասեր կանցկացնի Երևանում, Մեղրիում և Կապանում
Անվանի դաշնակահար, Չայկովսկու անվան միջազգային մրցույթի առաջին մրցանակի մրցանակակիր (2015թ.) Դմիտրի Մասլեևը վարպետության դասերով ժամանել է Հայաստան․ վարպետության դասեր կանցկացվեն Երևանում և Սյունիքի մարզում։
Աշխարհահռչակ դաշնակահարը Հայաստան է այցելել Primavera Foundation of Armenia-ի հրավերով: Մասնակիցների համար վարպետության դասերն անվճար են:
Դմիտրի Մասլեևի դասերը հուլիսի 7-ին կայացել են Երևանում, հուլիսի 8-ին ևս դաշնակահարը վարպետության դասեր է անցկացրել Երևանում՝ «Արամ Խաչատրյան» համերգասրահում:
Հուլիսի 10-ից 12-ը Մասլեևը կայցելի Սյունիք՝ անցկացնելով վարպետության դասեր մարզի պատանի եաժիշտների հետ և հանդիպումներ՝ երաժշտական դպրոցների ուսուցիչների հետ: Միջոցառումները տեղի կունենան Մեղրիում և Կապանում: Բոլոր միջոցառումներն անվճար են թե՛ ակտիվ մասնակիցների, թե՛ ունկնդիրների համար:
Լրագրողների հետ հանդիպանը Մասլեևն ասել է, որ արդեն հասցրել է պարապել մի քանի տաղանդավոր երիտասարդների հետ. ‹‹բոլորը շատ բարդ և ծավալուն ստեղծագործություններ են ներկայացրել և ի սկզբանե ծրագրած 40-ական րոպեի փոխարեն որոշեցինք ամեն դաշնակահարի հետ պարապել ամենաքիչը մեկ ժամ: Երեխաները շատ տաղանդավոր են և արագ են ընկալում ու մեծ եռանդով ջանում են արձագանքել իմ բոլոր նկատողություններին ու ուղղորդումներին››: Մասլեևը նաև հավելեց, որ շատ ոգևորված է դեպի Սյունիք իր ճանապարհորդությամբ և վստահ է, որ այնտեղ կգտնեն ոչ պակաս տաղանդավոր երեխաների:
Նա նշեց, որ մասնագիտական հարցերում երիտասարդներին աջակցելն ու ուղղորդելն անչափ կարևոր է, քանի որ ժամանակին իրեն էլ են օգնություն ցուցաբերել և հիմա նա պարտավոր է նույնն անել գալիք սերնդի համար:
Primavera Foundation of Armenia-ի համահիմնադիր Ելենա Յակովլևան ասել է, որ Դմիտրի Մասլեևը հանդիսանում է հիմնադրամի կրթական ակադեմիայի դաշնամուրի բաժնի ղեկավարը: Նա պարբերաբար կայցելի Հայաստան՝ հետևելու տաղանդավոր երեխաների աճին, ինչպես նաև հիմնադրամը վարպետության դասեր անցկացնելու համար կկազմակերպի այն անվանի դաշնակահարների այցը Հայաստան, որոնց կհրավիրի Մասլեևը:
Հիմանադրամի նպատակն է, որ երիտասարդ սերունը ոչ միան հնարավորություն ունենա ստանալ ակադեմիական կրթություն կոնսերվատորիայում և այլ ուսումնական հաստատություններում այլ նաև պրակտիկ գործող ու հաջողությունների հասած պրոֆեսիոնալներից, որոնք խորհուրդներ կտան ոչ միայն մասնագիտական հարցերում, այլ նաև կուղղորդեն կարիերայի ճիշտ կառուցման գործում:
«Հայաստանն աշխարհում հայտնի է ողբերգական իրադարձություններով ու դժվար պատմական անցյալով: Մենք ցանկանում ենք նպաստել, որ Հայաստանը ճանաչեն իր հարուստ մշակույթով ու տաղանդավոր հայորդիներով: Այս ուղղությամբ հիմանդրամի կողմից ծավալուն աշխատանքներ են իրականացվելու, որոնց մասին դեռ առիթ կունենանք խոսել»,-եզրափակեց տիկին Յակովլևան:
Դմիտրի Մասլեևին France Musique ռադիոկայանը Ֆրանսիայի ազգային նվագախմբի հետ դեբյուտից առաջ ներկայացրել է որպես. «Սուպեր մենակատար»:
Այստեղ նա կատարել է Չայկովսկու Դաշնամուրի թիվ 1 կոնցերտը։ Հենց այս ստեղծագործության հետ է կապված Մասլեևի միջազգային կարիերան, որը մեծ թափով առաջ սլացավ 2015թ.-ին Մոսկվայում կայացած Չայկովսկու անվան միջազգային մրցույթում նրա փայլուն հաղթանակից հետո:
2022թ.-ին Մասլեևի դեբյուտը Փարիզի ֆիլհարմոնիայում հաստատեց, որ մեր ժամանակի ամենահետաքրքիր դաշնակահարների մեջ նոր երևույթ է ի հայտ եկել.
«Ինչպիսի՜ արտիստ: Ամեն ինչ այնքան պարզ է, այնքան հանճարեղ, առանց երաժշտությունը բացատրելու, անգամ, ամենափոքր ճիգի»,- գրել է Ալեն Լոմպեկը (Bachtrack):
Մասլեևի վիրտուոզ և միևնույն ժամանակ պոետիկ ու խորը զգացմունքային կատարումներով հիանում է ողջ աշխարհի երաժշտասեր հանրությունը՝ ԱՄՆ-ից մինչև Ճապոնիա, Եվրոպայից մինչև Թայվան, Արգենտինա, Բրազիլիա, Կոլումբիա, Չիլի և Էկվադոր:
Մասլեևը այս տարվա սեպտեմբերին Հայաստանի ազգային ֆիլհարմոնիկ նվագագախմբի հետ առաջին անգամ համերգով հանդես կգա Հայսատանում՝ Երևանյան 15-րդ միջազգային երաժշտական փառատոնի շրջանակում:
Primavera Foundation of Armenia բարեգործական հիմնադրամը Հայաստանում գործում է 2021թ.-ից և ուղղված է հայ մշակույթի ու արտիստների միջազգային ինտեգրմանը, հայ երիտասարդ երաժիշտների բացահայտմանն ու աջակցմանը, կրթական ծրագրերի միջոցով կատարողական արվեստի և արվեստի մենեջմենտի զարգացմանը:
Այս տարի հիմնադրամը, միջազգային կարգի մասնագետների մասնակցությամբ, կազմակերպել է կիթառի դասեր ու համերգներ Տավուշի մարզում՝ Նոյեմբերյանում, Իջևանում և Կողբում, ինչպես նաև մայրաքաղաք Երևանում:
Հիմնադրամը հանդիսանում է Հայաստանի ազգային ֆիլհարմոնիկ նվագախմբի գործընկերը, որի հետ իրականացրել է աշխարհահռչակ դաշնակահարներ Լյուկա Դեբարգի, Պոլինա Օսետինսկայայի վարպետության դասերն ու համերգները Երևանում, ինչպես նաև դաշնակահար Միխայիլ Պլետնյովի ելույթը՝ լեգենդար դիրիժոր Վլադիմիր Ֆեդոսեևի ղեկավարությամբ:
