ԱՄՆ-ն մտահոգված է ԼՂ-ում մարդկային կորուստների առնչությամբ․ Վեդանտ Պատել
ԱՄՆ-ն խորապես մտահոգված է Լեռնային Ղարաբաղում մարդկային կորուստների առնչությամբ, սակայն տեղի ունեցած միջադեպը չի ազդել Հայաստանի և Ադրբեջանի արտգործնախարարների հանդիպման ժամանակացույցի վրա։ Այս մասին հայտնել է ԱՄՆ պետքարտուղարության խոսնակի առաջին տեղակալ Վեդանտ Պատելը։
«Մենք խորապես անհանգստացած ենք Լեռնային Ղարաբաղում մարդկային կորուստների պատճառով և մեր ցավակցությունն ենք հայտնում բոլոր զոհվածների ընտանիքներին։ Այս վերջին միջադեպերն ընդգծում են ռազմական գործողություններից զերծ մնալու և տևական ու արժանապատիվ խաղաղություն հաստատելու անհրաժեշտությունը», – ասել է դիվանագետը։
Վեդանտ Պատելը շեշտել է, որ ԱՄՆ պետքարտուղար Էնթոնի Բլինքենը շարունակում է ներգրավված մնալ Հայաստանի և Ադրբեջանի միջը խաղաղության հաստատման գործընթացում։ Բացի Բլինքենից, բանակցային գործընթացում ներգրավված են նաև Հարավային Կովկասում բանակցությունների հարցերով ԱՄՆ պետքարտուղարության ավագ խորհրդական Լուիս Բոնոն, ինչպես նաև պետքարտուղարության թիմի այլ անդամներ։
«Երեկվա (խմբ․՝ հունիսի 27-ի) հանդիպումները կառուցողական էին», – ասել է նա՝ ընդգծելով, որ բանակցությունները շարունակվել են հունիսի 28-ին և կշարունակվեն նաև հունիսի 29-ին այնպես, ինչպես պլանավորված էր։
Վեդանտ Պատելը հրաժարվել է մեկնաբանել լրագրողի բարձրացրած հարցը՝ արդյոք Լեռնային Ղարաբաղում տեղի ունեցած միջադեպը կարող է խոչընդոտել բանակցությունների ընթացքին և կողմերին ստիպել սառեցնել հակամարտությունը։
Ադրբեջանի զինված ուժերի ստորաբաժանումները հունիսի 28-ին՝ ժամը 01:30-ից, հրետանային միջոցներից կրակ են բացել Մարտունու և Մարտակերտի հայկական դիրքերի ուղղությամբ` կիրառելով նաև ԱԹՍ-ներ։ Հայկական կողմն ունի 4 զոհ:
