Մասկը մարզումներ է անցկացրել ջիու ջիցուի սև գոտի Լեքս Ֆրիդմանի հետ՝ պատրաստվելով Ցուկերբերգի հետ մենամարտին
Ամերիկացի միլիարդատեր Իլոն Մասկը մարտարվեստի պարապմունք է անցկացրել ռուս-ամերիկացի հայտնի բլոգեր և գիտնական, ջիու ջիցուի սև գոտի Լեքս Ֆրիդմանի հետ՝ պատրաստվելով խառը մենամարտերի կանոններով (MMA) մենամարտին META ընկերության ղեկավար Մարկ Ցուկերբերգի հետ: Այս մասին Ֆրիդմանը հունիսի 28-ին հայտնել է Twitter-ի իր էջում:
«Երեկ ես Իլոն Մասկի հետ հանպատրաստից մարզվել եմ մի քանի ժամ: Ես չափազանց տպավորված եմ նրա ուժով, հզորությամբ և հմտություններով ինչպես ոտքի վրա, այնպես էլ գետնին: Դա էպիկական էր»,- գրել է Ֆրիդմանը:
Նա նաև հավելել է, որ «շատ ոգեշնչող է տեսնել, թե ինչպես են Իլոնն ու Մարկը մարտարվեստով զբաղվում, բայց ավելի լավ կլիներ ամբողջ աշխարհի համար, եթե նրանք պարզապես մարզվեին և չմենամարտեին ռինգում»։
Իր հերթին, Մարկ Ցուկերբերգը մայիսին մասնակցել է ջիու ջիցուի իր առաջին մրցաշարին՝ արժանանալով ոսկե և արծաթե մեդալների:
Հունիսի 22-ին Ցուկերբերգն ընդունել էր Մասկի հրավերը՝ հարաբերությունները պարզելու առանց կանոնների մենամարտում: Մասկը մենարմարտի էր կանչել Meta ընկերության ղեկավարին այն բանից հետո, երբ համացանցում տեղեկություն էր հայտնվել, թե Meta-ն մտադիր է ստեղծել Մասկին պատկանող Twitter-ի մրցակից հարթակ:
Ultimate Fighting Championship-ի (UFC) նախագահ Դեյնա Ուայթի կարծիքով՝ Մասկ-Ցուկերբերգ մենամարտը կլինի պատմության մեջ ամենադիտվածը և հարյուրավոր միլիոն դոլար կհավաքի բարեգործական նպատակներով: Ուայթը մտադիր է կազմակերպել երկու միլիարդատերերի մարտը:
