Իրանում 12 մարդ է մահացել սուռոգատային ալկոհոլից թունավորման պատճառով
Առնվազն 12 մարդ է մահացել, ավելի քան 150-ը՝ տուժել Իրանի հյուսիսի Ալբորզի նահանգում սուռոգատային ալկոհոլից թունավորման հետևանքով։ Նման տեղեկություն է հաղորդել տարածաշրջանի Բժշկական գիտությունների համալսարանի նախագահ Շահրամ Սայադին: Այս մասին տեղեկանում ենք ТАСС գործակալությունից:
«Երկուշաբթի օրվա՝ հունիսի 19-ի դրությամբ, թունավորվածների թիվը հասել է 155-ի: Ցավոք, այս պահի դրությամբ 12 մարդ մահացել է», – հայտարարել է Սայադին, որի խոսքը մեջբերում է ISNA գործակալությունը։
Իրանի Tasnim լրատվական գործակալության տվյալներով՝ անցած շաբաթ Քերեջ քաղաքի (Ալբորզի նահանգի վարչական կենտրոն) մի քանի բնակիչներ ծանր թունավորման ախտանիշներով տեղափոխվել են բժշկական հաստատություններ։ Բժիշկները պարզել են, որ նրանք թունավորվել են կեղծված ալկոհոլից:
Իրանի իրավապահ մարմինները պարզում են, թե ինչպես է շուկայում հայտնվել սուռոգատային ալկոհոլը:
Ալկոհոլի արտադրությունը, վաճառքը և օգտագործումն Իրանում արգելված են 1979 թվականի Իսլամական հեղափոխության ժամանակներից:
