Ադրբեջանի ԶՈւ կողմից ՀՀ տարածքում շինաշխատանքներին մասնակցող օտարերկրացիների սպանության փորձի դեպքի առթիվ քրեական վարույթ է նախաձեռնվել
Երասխում կառուցվող գործարանի ուղղությամբ Ադրբեջանի ԶՈւ կողմից կրակոցներ արձակելու և շինաշխատանքներին մասնակցող երկու օտարերկրացի, քաղաքացիական անձանց սպանության փորձի դեպքի առթիվ քրեական վարույթ է նախաձեռնվել: Այս մասին տեղեկանում ենք ՀՀ քննչական կոմիտեի տարածած հաղորդագրությունից:
«2023 թվականի հունիսի 14-ին ժամը 11:30-ի սահմաններում, հակառակորդի մարտական դիրքերից, ռասայական, ազգային, էթնիկ ծագումով պայմանավորված ատելության, անհանդուրժողականության կամ թշնամանքի շարժառիթով, շատերի կյանքի համար վտանգավոր եղանակով, ապօրինաբար մեկ կամ մի քանի անձանց կյանքից զրկելու դիտավորությամբ, կրակոցներ են արձակվել Արարատի մարզի Արարատ համայնքի Երասխ բնակավայրի՝ քաղաքացիական օբյեկտ հանդիսացող նոր կառուցվող գործարանի ուղղությամբ։
Կրակոցների հետևանքով հրազենային վնասվածքներ են ստացել նշված գործարանում շինարարական աշխատանքներում ներգրավված աշխատակիցներից Հնդկաստանի քաղաքացիներ հանդիսացող 1983թ․ ծնված Մուհամադ Ասիֆը և 1998թ․ ծված Միրհասան Սահաջանը: Վերջիններս նույն օրն ընդունվել են Արարատի բժշկական կենտրոն և ստացել համապատասխան բուժօգնություն:
Դեպքի առթիվ ՀՀ քննչական կոմիտեի զինվորական քննչական գլխավոր վարչության ութերորդ կայազորային քննչական բաժնում ՀՀ քրեական օրենսգրքի 44-155-րդ հոդվածի 2-րդ մասի 7-րդ և 15-րդ կետերի հատկանիշներով նախաձեռնվել է քրեական վարույթ»,- ասված է հաղորդագրության մեջ:
Կատարվում է նախաքննություն։ Իրականացվել է դեպքի վայրի զննություն, նշանակվել են դատաբժշկական փորձաքննություններ։ Ձեռնարկվել են անհետաձգելի ապացուցողական և վարույթային գործողություններ:
Որոշումներ են կայացվել նաև՝ դատաձգաբանական և դատահետքաբանական համալիր փորձաքննություններ նշանակելու մասին:
