Աբխազիայում տեղատարափը հեղեղել է Գագրան և վնասել ՌԴ տանող ճանապարհը
Աբխազիայի առողջարանային Գագրա քաղաքում առավոտյան մոլեգնած սաստիկ տեղատարափի հետևանքով լեռնային վտակները դուրս են եկել ափերից և հեղեղել տներն ու ճանապարհները: Այդ մասին տեղեկանում ենք «Интерфакс» գործակալությունից:
Աբխազիայի արտակարգ իրավիճակների նախարարության մամուլի քարտուղար Ռոման Լաբիան հայտնել է, որ ջրի հորձանքը լրջորեն վնասել է Աբխազիայից Ռուսաստան տանող միակ ճանապարհի ասֆալտե ծածկույթը։ Երթևեկությունը մայրուղով դադարեցվել է երեք ժամով։։
«Ներկայում ջուրն սկսել է իջնել: Երթևեկությունը մասամբ վերականգնվել է դարձափոխային սխեմայով: Թույլատրվում է ավտոմեքենաների տեղաշարժը», – ասել է նա։
Լաբիայի խոսքով՝ տարերքը վնասել է մի քանի առանձնատներ և մինի հյուրանոցներ։ Տուժածներ չկան։
Մացեստա գետը դուրս է եկել ափերից Սոչիի Խոստայի շրջանում (աբխազական Գագրայից մոտավորապես 65 կմ հեռավորությամբ) մոլեգնած տեղատարափների պատճառով: Հեղեղումների հետևանքով ջրածածկ են եղել մեքենաները, տնամերձ տարածքները, շենքերի նկուղները, փակվել են լողափերը։
