Georgian Airways-ը չեղարկել է Երևանով Թբիլիսի-Մոսկվա թռիչքների իրականացումը
Վրացական Georgian Airways ավիաընկերությունը, Վրաստանի և Ռուսաստանի Դաշնության միջև ուղիղ չվերթների վերականգնման մասին հայտարարությունից հետո, չեղարկել է Թբիլիսի-Մոսկվա թռիչքները Երևանով տարանցիկ ճանապարհով։
«Այո, մենք մայիսի 20-ից հետո չեղարկել ենք բոլոր տարանցիկ չվերթները»,- չորեքշաբթի ՏԱՍՍ-ին հայտնել են ավիաընկերությունից։
Ճշտող հարցին, թե արդյոք ուղևորներին կվերադարձվի գնված տոմսերի համար գումարը, թե՞ դրա փոխարեն ուղիղ չվերթի տոմս կտրամադրվի նույն ամսաթվերին, ավիաընկերությունից ասել են, որ դեռ որոշում չկա։ Նրանք նշել են, որ կոմերցիոն վարչությունը լուծում է Երևանով տարանցիկ թռիչքների համար «Էյր Դիլիջանս» հայկական ավիաընկերությունից գնված տոմսերի հարցը, և մինչև օրվա վերջ ուղևորները տեղեկատվություն կստանան։
Միաժամանակ Georgian Airways-ը վստահեցրել է, որ Երևանով նախատեսված չվերթները, որոնք նախատեսված էին մինչև մայիսի 20-ը, կիրականացվեն։
Ավելի վաղ Վրաստանի Քաղաքացիական ավիացիայի գործակալությունը հայտնել էր, որ Georgian Airways-ը մայիսի 20-ից կսկսի կանոնավոր չվերթներ իրականացնել Թբիլիսի-Մոսկվա-Թբիլիսի երթուղով՝ շաբաթական յոթ անգամ հաճախականությամբ։ Նույն օրը երեկոյան ավիաընկերության կայքում բացվել է Մոսկվայի ուղղությամբ տոմսերի վաճառքը։ Միաժամանակ, վաճառքից անհետացել են «Էյր Դիլիջանս» տարանցիկ չվերթները Երևանով, որոնք նախկինում վաճառվում էին Georgian Airways-ի կայքում։
