Համայնքային ոստիկանները նորապատցու տանը ապօրինի պահվող զինամթերք են հայտնաբերել

Փետրվարի 11-ին Արմավիրի բաժնի համայնքային ոստիկանության բաժանմունքում տեղեկություններ էին ստացվել, որ Նորապատ գյուղում բնակվող հայր և որդի տանն ապօրինի պահում են զենք-զինամթերք։

Փաստի առթիվ Արմավիրի մարզային քննչական վարչությունում նախաձեռնվեց քրեական վարույթ։ Վարույթի շրջանակներում իրավապահները զննեցին նշված տունը։ Հայտնաբերվեցին տարբեր հրազենների և տրամաչափի 35 փամփուշտ, մարտական նռնակներ, նռնակի պայթուցիչներ, ծխանռնակ, դանակներ, այդ թվում՝ սվին-դանակ։ Հայտնաբերվեց նաև կանեփի չորացած բույս։

29-ամյա երիտասարդը հայտնել է, որ կանեփը քաղել էր Նորապատ գյուղի դաշտից, իսկ զինամթերքը բերել էր 44-օրյա պատերազմից հետո՝ Արցախից։

Նշանակվել են փորձաքննություններ։ Հանգամանքները պարզվում են։