Բեռնատար գնացքը բախվել է BMW մակնիշի մեքենային. մեկ մարդ մարմնական վնասվածքներ է ստացել
ՀՀ Կոտայքի մարզում հոկտեմբերի 27-ին ժամը 21:30-ի սահմաններում բեռնատար գնացքը բախվել է BMW մակնիշի ավտոմեքենային, ինչի հետևանքով մեկ մարդ ստացել է մարմնական վնասվածքներ և տեղափոխվել «Հրազդան» բժշկական կենտրոն:
Ինչպես հայտնում են «Հարավկովկասյան երկաթուղի» ընկերությունից, բախումը տեղի է ունեցել Քաղսի գյուղի ինքնակարգավորվող գծանցի վրա՝ գնացքի՝ մոտ 30 կմ/ժ արագության պարագայում: Համաձայն լոկոմոտիվային բրիգադի՝ լոկոմոտիվի ազդանշանային սուլոցներին ավտոմեքենայի վարորդն արձագանքել է իր կողմից արձակած պատասխան ձայնանշաններով, անտեսել է գծանցի մոտ տեղադրված երթևեկության՝ շարժումն արգելող նշանները, մտել է գծանց և կանգ առել անմիջապես երկաթգծի ուղիներում:
Ուղևորը նախքան բախումը հասցրել է դուրս գալ մեքենայից: Լոկոմոտիվային բրիգադն անմիջապես արգելակել է գնացքի ընթացքը, ինչը, սակայն, թույլ չի տվել խուսափել բախումից, քանի որ մինչև ավտոմեքենան ընկած հեռավորությունը կազմել է մոտ 50 մետր: Սակայն գնացքի ցածր արագությունը և հրատապ արգելակումը մեղմել են հարվածի ուժը, ինչն, ըստ էության, փրկել է ավտոմեքենայի վարորդի կյանքը:
«Հարավկովկասյան երկաթուղի» ընկերությունը վարորդներին հորդորում է առողջությունը, կյանքը և ունեցվածքը պահպանելու համար լինել զգոն երկաթուղային ճանապարհներով երթևեկելիս և խստորեն պահպանել ճանապարհային երթևեկության կանոնները: Ընկերությունը հորդորում է նաև չօգտագործել անօրինական անցումներ և հատել գծերը միայն հատուկ նախատեսված և սարքավորված վայրերում:
