Մալաթիա-Սեբաստիայում մեկնարկած սոցիալական աջակցության նոր ծրագրում ավելի քան 45 ընտանիք է ընդգրկվել
Երևանի Մալաթիա-Սեբաստիա համայնքում սոցիալական աջակցության նոր ծրագիր է մեկնարկել: Այս մասին տեղեկացրին Երևանի քաղաքապետարանի լրատվության վարչությունից:
«Ավելի քան 45 ընտանիք է ընդգրկվել այս ծրագրում, որով տրամադրում ենք անհրաժեշտ կենցաղային տեխնիկա: Մենք այս բաշխումն իրականացնում ենք՝ նախապես կատարելով տնայցեր: Մեր սոցիալական աշխատողները կազմում են կարիքի գնահատում, որից հետո, միայն, սկսում ենք տեղաբաշխել ընտանիքներին՝ ըստ ծրագրերի»,-ասում է Մալաթիա-Սեբաստիա վարչական շրջանի ղեկավար Սաշա Կատվալյանը:
Սոցիալական ծրագրում ներառված են բազմազավակ ընտանիքներ, հաշմանդամության խնդրով քաղաքացիներ, տարեցներ, Արցախյան պատերազմներում զոհվածների ու մասնակիցների ընտանիքներ: Բնակիչների խնդիրներին վարչական շրջանի ղեկավարն ու քաղաքապետարանի երեխաների և սոցիալական պաշտպանության վարչության պետն անձամբ են ծանոթանում:
Տարիներ առաջ Հաղթանակ թաղամասում վարկային միջոցներով Արցախյան ազատամարտի մասնակից Խաչիկը հողատարածք է գնել, սկսել տան շինարարությունը, բայց միջոցները չեն բավարարել, գործն այդպես էլ անավարտ է թողել: Երկու անչափահաս զավակի հայրն ասում է՝ թեև պատերազմում կորցրել է ոտքերը, բայց կամքի ուժն ամուր է: Վարչական շրջանն այժմ բարերարների աջակցությամբ մտադիր է լուծել խնդիրը:
«Բոլոր թիրախները ընտրված են շատ հասցեական: Այս ծրագիրը լավ նախադեպ է և օրինակելի ձևաչափ կարող է լինել այլ վարչական շրջաններում»,- ընդգծում է Երևանի քաղաքապետարանի աշխատակազմի երեխաների և սոցիալական պաշտպանության վարչության պետ Լուսինե Հովհաննիսյանը:
Շուրջ 141 հազար բնակչություն ունեցող Մալաթիայում սոցիալական խնդիրները քիչ չեն: Տարեսկզբից մինչև սեպտեմբեր սոցիալական աջակցության տարբեր ծրագրերում ընդգրկվել է 1150 ընտանիք: Փոքր, թե՝ մեծ. բոլոր խնդիրներին հասցեական լուծումներ են տրվում. «Կանգնած ենք այն հասեցում, որտեղ իրականացվել է տանիքի նորոգում: Ընտանիքը ունակ չէր ինքնուրույն լուծել խնդիրը, մեր սոցիալական ծրագրերի շրջանակում որոշեցինք այս հասցեում իրականացնել տանիքի մասնակի նորոգման աշխատանքներ»,-մանրամասնում է Սաշա Կատվալյանը:
Մալաթիա-Սեբաստիա վարչական շրջանի ղեկավարը վստահեցնում է՝ այս և սոցիալական մյուս ծրագիրը շարունակական են լինելու նաև հաջորդ տարի:
